Kryetari i Kuvendit të Kosovës, Glauk Konjufca, ka kërkuar konsolidim të mekanizmave të sigurisë dhe gjyqësisë që raste të vrasjes së grave mos të ndodhin më.
Sipas kryeparlamentarit, vrasja e sotme në Pejë, por edhe ajo e para disa ditësh në Ferzaj janë bërë nga burra që kanë pasur vepra penale sa i përket dhunës në familje.
Konjufca: Rastet që po ndodhin kundër grave dhe vajzave dhe dhuna e ushtruar është prej personave që kanë pasur raste penale dhe shkelje të rënda
"Ajo çka është urgjente që duhet të ndodh është konsolidimi i mekanizmave tanë të sigurisë dhe gjyqësisë që raste të tilla mos të ndodhin. Rastet që po ndodhin kundër grave dhe vajzave dhe dhuna e ushtruar është kryesisht prej personave të cilët edhe më herët kanë pasur raste penale dhe shkelje të rënda. Sistemi i drejtësisë me shumë lehtësi i liron ata dhe kjo është parapërgatitje për raste më të rënda, siç ishte me dy rastet që ndodhën në Kosovë", theksoi Konjufca.
Konjufca në Forumin për Gratë, Paqen dhe Sigurinë, kërkoi drejtësi edhe për të mbijeturat e dhunës sekuale gjatë luftës në Kosovë.
Konjufca: Dokumentimi i këtij krimi ç'njerëzor është mjet i fuqishëm për përpjekjet për drejtësi dhe ngritje të vetëdijës shoqërore
"Kurajo dhe forca e viktimave të këtij krimi ç'njerëzor të luftës për të ngritur zërin dhe zbardhur të vërtetën është mjë frymëzim i jashtëzakonshëm për të gjithë ne. Ato përveç frikës përballën me stigmën shoqërore dhe mungesën e drejtësisë, derisa kriminelët që kanë kryer këto krime nuk e kanë marrë dënimin e merituar. Dokumentimi i këtij krimi ç'njerëzor është mjet i fuqishëm për përpjekjet për drejtësi dhe ngritje të vetëdijës shoqërore", shtoi ai.
Ndërkaq, ai potencoi edhe angazhimin e Kuvendit të Kosovës për barazi gjinore.
