Ish-kolonel Refki Morina duke komentuar veprimin e autoriteteve serbe për ndalimin e qytetarëve nga Kosova në kufi, ka thënë se kjo është shkelje e parimeve demokratike të lirisë së lëvizjes.
Sipas Morinës, duhet një reagim nga Bashkësia Evropiane dhe shtetet e QUNT-it duhet që më me ngulm t’ia tërheqin vërejtën Serbisë.
Ai madje thotë se për veprimin e tillë, shtetit serb duhet t’i dërgohet notë verbale.
“Serbisë duhet t’i bëhet e qartë që nëse dëshiron me qenë në Evropë duhet t’i përvetësojë parimet demokratike të lirisë së lëvizjes, pa marr parasysh moshën, gjininë e racën. Mendoj që Kosova duhet të trumbetojë te shtetet tjera të Bashkësisë Evropiane dhe tu tregojë që një veprim i tillë me zyrtarët policorë, një sjellje e tillë e Serbisë është e patolerueshme. Shtete e QUINT-it duhet më me ngulm t’i tërheqin vërejtjen Serbisë për arsye se nuk luhet me të drejtat dhe liritë e qytetarëve. Duhet të dërgohet notë verbale ndaj Serbisë”, është shprehur ai.
Morina ndalimin e qytetarëve në kufi po e sheh si pasojë të një irritimi që po i shkakton Serbisë integrimi evropian i Kosovës.
“Marrëveshjet e nënshkruara në Bruksel dhe të tjerat për lirinë e lëvizjes së lirë, Serbia as që do të dëgjojë për to për arsye se ajo vazhdimisht burgos, arreston, maltreton gra e fëmijë si rasti i djeshëm, ku 20 orë i ka lënë nën qiellin e hapur. Kjo tregon për një regjim hegjomonist të Vuçiqit. Kjo tregon që Serbia duke e parë që Kosovën nuk mund ta ndal në integrimin evropian, e ka irrituar”, ka shtuar ai.
Ndërsa ish-koloneli duke e njohur edhe për nga afër zv.drejtorin e Policisë së Kosovës, Dejan Jankoviç, ka thënë se ai ka qenë bashkëpunëtorë me shqiptarët, andaj një gjë e tillë e ka penguar Serbinë, çka edhe e ka shtyrë ta arrestoj dje.
“Dejan Jankoviç ka qenë punëtorë, ka punuar një kohë të gjatë në Gjilan e Ferizaj dhe ka qenë vazhdimisht duke kryer punën në bazë të rregullave, ka qenë bashkëpunëtorë me të gjitha nacionalitete edhe me shqiptarët dhe mendoj që një veprim i tillë i punës së tij e ka penguar Serbinë për arsye se integrimi i tij në Policisë e Kosovës dhe shumë pjesëtarëve tjerë është pengesë për Serbinë”, përfundoi ai.
Ndryshe, autoritetet serbe të mërkurën kanë ndaluar autobusë me udhëtarë nga Kosova, në kufijtë me Kroacinë dhe Hungarinë, si “shenjë hakmarrjeje ndaj mbështetjes nga Asambleja Parlamentare e Këshillit të Evropës për anëtarësimin e Kosovës në këtë organizatë”.
