Presidentja e Kosovës, Vjosa Osmani, ka pritur në takim përfaqësues diplomatik të disa shteteve anëtare në Këshillin e Evropës.
Osmani ka pritur në takim ambasadorë e të ngarkuar me punë nga ambasadat e Suedisë, Austrisë, Holandës, Finlandës, Zvicrës, Luksemburgut dhe Belgjikës.
Përfaqësuesit e këtyre shteteve e kanë përgëzuar Osmanin për suksesin e Kosovës në Asamblenë Parlamentare të Këshillit të Evropës, ndërsa presidentja i ka falënderuar për mbështetjen në votim.
“Më tej, Presidentja Osmani nënvizoi rëndësinë e anëtarësimit të Kosovës në Këshillin e Evropës si një hap vendimtar drejt rritjes së efektivitetit të mbrojtjes së të drejtave të të gjithë qytetarëve tanë pa dallim, duke u dhënë atyre qasje në mekanizmat për të drejta të njeriut që i ofron kjo organizatë”, ka njoftuar Presidenca.
Presidentja ka theksuar se mbështetja e këtyre shteteve për Kosovën është e rëndësishme edhe në votimin që mund të mbahet në muajin maj, në Komitetin e Ministrave.
“Në këtë kontekst, Presidentja Osmani përsëriti përkushtimin e palëkundur të Kosovës për ruajtjen e vlerave dhe standardeve evropiane, duke theksuar progresin e bërë në forcimin e institucioneve demokratike, promovimin e sundimit të ligjit dhe mbrojtjen e të drejtave të njeriut”, thuhet tutje në njoftim.
