Ministri i Financave Hekuran Murati, menaxheri i projektit Fit for Jobs, Tobias Seiberlich dhe drejtoresha e Agjencisë së Punësimit Jehona Rexha takuan sot përfituesit nga skema e kuponëve për trajnim në teknologji informative.
Në kuadër të kësaj skeme, 240 të rinj kanë përfituar kuponë trajnimi në fusha të ndryshme të teknologjisë informative nga marketingu, dizajni e deri te programi e rrjetet kompjuterike.
Me këtë rast, ministri Murati ritheksoi mbështetjen e Qeverisë në ngritjen e kapaciteteve për tranzicion më të lehtë nga edukimi në punësim.
"Nga ana jonë, për ta bërë tranzicionin tuaj më të lehtë për tregun e punës, kemi dedikuar platforma dhe masa të veçanta, si superpuna e Kosovo Generation Unlimited," tha ai.
Menaxheri i projektit Fit for Jobs, theksoi bashkëpunimin e suksesshëm në mes të GIZ dhe Ministrisë së Financave për aktivizimin e të rinjve në tregun e punës, ndërsa drejtoresha e Agjencisë së Punësimit ftoi të rinjtë të regjistrohen në zyrat e punësimit në komunat e tyre, që të përfitojnë nga ofertat e kësaj agjencie.
Në këtë takim, të rinjtë patën mundësi të mësojnë më shumë mbi masat që ofron Qeveria e Kosovës nga këshilltarët e punësimit të APRK.
