Mandatari për përbërjen e re të Qeverisë së Serbisë, Millosh Vuçeviq, dhe deputeti serb Millosh Jovanoviq, kanë debatuar në lidhje me Kosovën në seancën e sotme të Kuvendit të Serbisë.
Deputeti Jovanoviq akuzoi qeverinë serbe për “shitjen e Kosovës”.
“Aleksandar Vuçiq nënshkroi gjithçka vitin e kaluar, keni gënjyer për marrëveshjen, bëni sikur jeni patriotë. Çfarë shkruhet në planin franko-gjerman?”, pyeti Jovanoviq, raporton “Danas”.
“Nuk mund të flitet për të drejta të barabarta me krahinën, a jeni normalë o njerëz”, tha ai.
Vuçeviq, duke iu përgjigjur Jovanoviqit, tha se ishin pikërisht politikat e kohës kur ai ishte në pushtet që lanë pasoja katastrofike për Serbinë “për të cilat ne po paguajmë edhe sot”.
“Askush nuk ka nënshkruar asgjë, por Vuçiqi ka thënë se Kosova nuk mund të jetë e pavarur, kurrë”, tha Vuçeviq duke iu përgjigjur Jovanoviqit.
Ai i kujtoi atij “grushtin e shtetit” që ndodhi në Serbi në kohën e Vojisllav Koshtunicës, kur u nënshkrua Marrëveshja e Beogradit me Havier Solanën dhe Millo Gjukanoviqin “kur humbëm daljen në det pas kaq shumë vitesh”.
“E humbëm Malin e Zi, organizuat një tubim për Kosovën ku u vodhën atletet, doni të bashkoheni me ata që njohin gjenocidin në Srebrenicë… Nëse do të kishim dalje në det sot, do të ishte shumë më e lehtë të merrnim atë që duhet marrë. Do të ishte më e lehtë për të luftuar për Kosovën, ju e dorëzuat edhe Malin e Zi dhe u përpoqët ta dorëzoni Kosovën dhe e bëtë në masë të mirë. Mos na bëni predikime morale se nuk keni të drejtë ta bëni këtë dhe rroftë Serbia”, ka thënë mandatari për përbërjen e re të qeverisë serbe, Millosh Vuçeviq.
