Zëvendësministri i infrastrukturës, Hysen Durmishi, ka përfunduar intervistimin në Prokurorinë Speciale në lidhje me nënshkrimin e kontratave për rrugën Prishtinë – Podujevë.
Durimshi në një deklarim për media ka thënë se ishte i ftuar në cilësinë e të dyshuarit.
“Isha i ftuar në cilësinë e të dyshuarit për rastin e projektit të ndërtimit të rrugës Prishtinë – Podujevë. Kryesisht kjo është fazë fillestare dhe pyetjet e prokurorit ishin pyetje sqaruese të cilat unë i sqarova të gjitha pyetjet që i kishte, për ta dëshmuar se procesi ka qenë i rregullt dhe se atje po zhvillohen punimet me dinamikë që e kishim planifikuar”, ka thënë Durmishi pas intervistimit nga Prokuroria.
Tenderi për të cilin është ftuar për intervistim zëvendësministrit Durimishi peshon 38 milionë euro. Ai është nënshkruar në vitin 2023 nga vet Durmishi, ndonëse asokohe ka pasur ankesë aktive kundër kontratave në Organin Shqyrtues të Prokurimit (OSHP).
Ligji i Prokurimit Publik e përcakton se në momentin kur ka ankesë aktive nga një operator ekonomik që ka marrë pjesë në tender, aktiviteti i prokurimit pezullohet dhe autoriteti kontraktues nuk ka të drejtë të procedojë me nënshkrim të kontratave.
Një nga pesë kontratat e dhëna përmes këtij tenderi, një prej tyre në vlerë prej 9.2 milionë eurove i ishte dhënë kompanisë “Bageri”, për të cilën zv/ministri Hysen Durmishi kishte thënë se pronarin e kësaj kompanie e ka shok.
