Kurti në Mal të Zi ia kërkon live këtë gjë Vuçiqit, ka edhe një porosi për BE-në - i pakënaqur edhe me Bosnjën

Kryeministri i Malit të Zi, Milojko Spajiq në Samitin e liderëve të Ballkanit Perëndimor dhe Bashkimit Evropian theksoi se do të vendosin një fokus të madh në të ardhmen e tregut të përbashkët rajonal dhe integrimin brenda tregut të përbashkët evropian.

Ai theksoi se Plani i rritjes për Ballkanin Perëndimor, para së gjithash sipas këndvështrimit tonë, përfaqëson një sinjal dhe përkushtim të qartë ndaj Bashkimit Evropian për transformimin ekonomik dhe demokratik të Ballkanit Perëndimor.

“Sidomos për bizneset Plani i rritjes paraqet një mundësi dhe paraqet një efekt të qartë sinjalizues se rajoni do të jetë pjesë e tregut më të madh. Shpeshherë them se Mali i Zi është treg 1/2 milion, por si pjesë e tregut të vetëm është pjesë e tregut gjysmë miliardësh. Mali i Zi në qeveri është i përkushtuar fuqimisht për të rritur prosperitetin ekonomik dhe cilësinë e jetës për qytetarët tanë. Me këtë parim që drejton çdo veprim tonin, ne kemi pritshmëri të mëdha për planin e rritjes. Duke njohur fazën aktuale dhe sfidat në zhvillimin ekonomik, agjenda e reformave të Malit të Zi përgatitet me një qëllim të qartë: të përdorë stimujt e ofruar nga Lehtësia e Reformës dhe Rritjes së BE-së për Ballkanin Perëndimor. Kjo nënkupton zbatimin e masave të rëndësishme reformuese në fushat strategjike që synojnë përshpejtimin e rritjes ekonomike dhe sigurimin e përafrimit me standardet e BE-së”, theksoi ai.

Spajiq thekson se fokusi kryesor i këtij Plani është populli.

Spajiq: Investimi në kapitalin njerëzor është ndoshta aspekti më i rëndësishëm

“Investimi në kapitalin njerëzor është ndoshta aspekti më i rëndësishëm i agjendave të reformës, me ndikim afatgjatë dhe të qëndrueshëm. Kjo është arsyeja pse sot diskutojmë gjithashtu disa mënyra praktike në të cilat plani i rritjes mund ta bëjë jetën tonë të përditshme më të lehtë. Mjetet praktike si “Digital Wallet”, “Critical Medical Alliance” do të na ndihmojnë të kuptojmë më gjerë kontekstin e asaj që ne mund t'u ofrojmë qytetarëve tanë përveç fuqizimit ekonomik”, tha ai.

Kryeministri Milojko Spajiq u ka bërë thirrje të gjithëve që të shfrytëzojnë këtë mundësi dhe të bashkëpunojnë drejt objektivit tonë të përbashkët që t’i hapet rrugë për përmirësimin e lehtësimit të tregtisë, integrimit rajonal, prosperitetit ekonomik si për Ballkanin Perëndimor ashtu edhe për Shtetet Anëtare të BE-së. 

Kryeministri i Republikës së Shqipërisë, Edi Rama, gjatë fjalës së tij në Samitin e liderëve që po mbahet sot në Mal të Zi ka përmendur mundësinë e planit të rritjes. Sipas tij është koha që rajoni të bëhet pjesë e portofolit dixhital evropian.

Rama: Ne duhet të ndërtojmë mundësinë e planit të rritjes

"Dhe dua të prek disa pika. Së pari, ne duhet të ndërtojmë mundësinë e planit të rritjes për t'u përgatitur për aderimin në një treg të vetëm, i cili është shtylla e parë e planit të rritjes. Dhe është koha që rajoni të bëhet pjesë e portofolit dixhital evropian. Individualisht, ne e kemi përfshirë këtë objektiv në planin tonë të reformës dhe synojmë të jemi gati deri në vitin 2027. Presim që komisioni të finalizojë udhërrëfyesin në mënyrë që të kemi një rrugë të qartë përpara në këtë drejtim, të bazuar, natyrisht, mbi praktikat evropiane dhe rregulloret”, tha Rama.

Rama tha se duhet ta bëjnë më të theksuar pjesëmarrjen e tyre në politikën e jashtme dhe të sigurisë.

Rama: Duhet ta paguajmë rrugën tani për anëtarësimin në zonën ekonomike evropiane

“Ne nuk duhet të presim derisa të përfundojnë të gjitha reformat në BE dhe kjo është diçka shumë e rëndësishme, përkundrazi ne duhet ta paguajmë rrugën tani për anëtarësimin gradual të rajonit në zonën ekonomike evropiane, në zonën evropiane të kërkimit dhe arsimit të lartë, në instrumentet e kohezionit të Unionit e kështu me radhë. Pra, ne duhet ta bëjmë më të theksuar pjesëmarrjen tonë në politikën e jashtme dhe të sigurisë që vjen. Ne duhet të jemi pjesë e të gjitha instrumenteve që lidhen me paralajmërimin e hershëm, parandalimin dhe menaxhimin e kërcënimeve të sigurisë kibernetike, dezinformimit etj. Në të njëjtën kohë, ne duhet të transferojmë, të dimë për tregun e vetëm pasi ka shumë pak njohuri për këtë, çdo fushë në zhvillim në Ballkanin Perëndimor. Për këtë arsye është në përputhje me fokusin tonë kombëtar dhe rajonal në forcimin e kapitalit njerëzor me një theks të veçantë në kërkimin dhe edukimin. Por ne kemi lënë të kuptohet tashmë propozimin për krijimin e Akademisë Rajonale të Tregut të vetëm”, shtoi kryeministri Edi Rama.

Rama tha se do të vazhdojnë të thellojnë bashkëpunimin rajonal.

Rama: I kërkova komisionit të na ndihmojë në përgatitjen e udhërrëfyesve

“Edhe pak fjalë përpara takimit të Sarajevës. Besoj se deri në atë takim ministrat tanë të integrimit në BE dhe ministrat e financave duhet të vazhdojnë të punojnë për nismat e vazhdueshme, të cilat synojnë të na integrojnë në një treg të vetëm. Të gjitha këto SEPA, Korsitë e Gjelbërta, aleanca materiale me rol kritik, marrëveshjet e vlerësimit të konformitetit, e kështu me radhë, kanë nevojë për punë dhe kanë nevojë për punën e përditshme të të gjithë njerëzve tanë. Dhe i kërkova komisionit të na ndihmojë në përgatitjen e udhërrëfyesve, shumë të qartë dhe konkretë për të na përgatitur të integrohemi plotësisht në këto fusha deri në vitin 2027."

Rama përmendi se këto takime duhet të strukturohen mes BE-së dhe rajonit.Liderët e vendeve të rajonit, përfaqësues të Bashkimit Evropian dhe Shteteve të Bashkuara të Amerikës, kanë diskutuar Planin e Rritjes për Ballkanin Perëndimor.

Samiti po mbahet nën sloganin "Një rajon, vizion i përbashkët". Në takimin e liderëve rajonalë po marrin pjesë edhe komisionari Varhelyi, dhe ndihmës Sekretari i Shtetit për Evropën dhe Euroazinë, O'Brien.

Liderët e Ballkanit Perëndimor, përfaqësues nga BE-ja e ShBA-ja u bënë bashkë sot në Kotor për të diskutuar Planin e Rritjes.

Nën logon “Një rajon, një vizion”, liderët bënë edhe një fotografi familjare, ku kryeministri i vendit, Albin Kurti ishte krah homologut të tij shqiptar, Edi Rama.

Ndërsa, presidenti serb, Aleksandar Vuçiq, ishte krah kryeministrit Milojko Spajiq dhe kryeministrit teknik të Maqedonisë së Veriut, Talat Xhaferi.

Plani i Zgjerimit të Ballkanit Perëndimor bazohet në katër shtylla, atë të rritjes së integrimit ekonomik me Tregun Unik të BE-së, rritjes së integrimit ekonomik brenda Ballkanit Perëndimor përmes Tregut të Përbashkët Rajonal, përshpëjtimin e reformave themelore dhe rritjes së ndihmës financiare.

Presidenti i Serbisë, Aleksandar Vuçiq gjatë konferencës së liderëve në Samitin e Ballkanit Perëndimor dhe BE-së që po mbahet në Malin e Zi, ka thënë se pret që Serbia t’i përmbush reformat e tregut të BE-së, të cilat ai e quajti ‘si reforma të vështira’.

Vuçiq: Shpresoj se mund të përafrohemi reformave të vështira

“Pres bisedime të mira, shpresoj se mund të përafrohemi reformave të vështira që po bëhen në tregun unik evropian, del që kjo është shumë e rëndësishme për të gjithë ne në Ballkanin Perëndimor. Gjithashtu besoj se anëtarësimi në Bashkimin Evropian, mund të arrijmë rezultate të rëndësishme për të gjjithë qytetarët, në të njëjtën kohë shpresojmë që sot do të kemi mundësi për këtë”, theksoi Vuçiq.

Ai foli edhe për Rezolutën për Srebrenicën, tha se nuk ka kurrfarë porosie për autoritet e Malit të Zi.

Vuçiq: Cili është kuptimi i asaj rezolute

“Nuk kam kurrfarë porosie. Ne e dimë cila është porosia jonë. Ne e dimë cili është qëndrimi i Malit të Zi për këtë, mirëpo cili është kuptimi që kjo nuk ka të bëjë me Malin e Zi. Dhe cili është kuptimi i asaj rezolute. Si është fajësimi kolektiv? Pasi fajësimi individual kalon në aktgjykime? Të tjerat ndryshojnë dhe nuk përmendet asgjë tjetër. Kështu të gjithë i marrin vendimet e veta”, tha ai shkurt para gazetarëve në Samitin që po mbahet në Kotor.  

Kryeministri i Kosovës, Albin Kurti para fillimit të Samitit të liderëve të Ballkanit Perëndimor dhe BE-së, ka deklaruar se këtë vit po shënojnë 10 vjetorin e Procesit të Berlinit dhe pret që të kenë një bashkëpunim më të mirë që nënkupton njohjen reciproke defakto dhe dejure të të gjitha vendeve të Ballkanit Perëndimor.

Para samitit i cili po mbahet në Kotorr të Malit të Zi, Kurti tha se përmendi planin patkoi të Serbisë, i cili kishte për qëllim spastrimin etnik të shqiptarëve, të cilët gjenden strehim në Mal të Zi, ndërsa tash ky shtet po mbledh liderët e rajonit.

Kurti: Bosnja dhe Hercegovina ende nuk e ka ratifikuar marrëveshjen për lirinë e lëvizjes vetëm me letërnjoftime

“Takimi i tretë i Planit të Rritjes së Bashkimit Evropian është një mundësi e shkëlqyer për të gjitha vendet e Ballkanit Perëndimor 6 që të bashkohen dhe të diskutojnë se si mund të integrohen më tej duke bërë reforma në vend por në të njëjtën kohë, për të parë se si mund të bëjmë më shumë dhe më mirë me Bashkimin Evropian në kuptimin e përfitimit të programeve mbështetëse nga Plani i Rritjes së BE-së, i cili në të njëjtën kohë do të na ofrojë akses në tregun e përbashkët të Bashkimit Evropian. Ne do të shënojmë 10 vjet të Procesit të Berlinit këtë vit dhe presim që të kemi një bashkëpunim më të mirë, që nënkupton njohjen reciproke defakto dhe dejure të të gjitha vendeve të Ballkanit Perëndimor. Me këtë rast më lejoni të shpreh se jemi të pakënaqur me faktin se Bosnja dhe Hercegovina ende nuk e ka ratifikuar marrëveshjen për lirinë e lëvizjes vetëm me letërnjoftime, për të cilën kemi rënë dakord 18 vjet më parë”, tha ai.

Liderët e vendeve të rajonit, përfaqësues të Bashkimit Evropian dhe Shteteve të Bashkuara të Amerikës, do të diskutojnë Planin e Rritjes për Ballkanin Perëndimor

Samiti po mbahet nën sloganin "Një rajon, vizion i përbashkët". Në takimin e liderëve rajonalë po marrin pjesë edhe komisionari Varhelyi, dhe ndihmës Sekretari i Shtetit për Evropën dhe Euroazinë, O'Brien.

Plani i Rritjes përfshin gjashtë miliardë euro grante dhe kredi për të përshpejtuar konvergjencën socio-ekonomike me BE-në - dy miliardë grante dhe katër miliardë kredi të buta të garantuara nga BE.

Komisionari evropian për Fqinjësi dhe Zgjerim, Oliver Varhelyi para fillimit të Samitit të liderëve të Ballkanit Perëndimor dhe BE-së, ka deklaruar se ky takim është vazhdimi i atij që kanë pasur në Tiranë, ku është diskutuar mundësia e planit të rritjes.

Sipas tij plani i rritjes është një realitet.

Varhelyi: Plani i rritjes tashmë do të fillojë të sjellë rezultate

“Ky takim është vazhdimi i atij që kemi pasur në Tiranë, ku kemi diskutuar mundësinë e planit të rritjes dhe sesi rajoni mund të punojë së bashku si anëtarë të ardhshëm të Bashkimit Evropian. Sot plani i rritjes është një realitet. Sot plani i rritjes është në lëvizje të plotë, kështu që tani do të diskutojmë se si do të zbatojmë të gjitha prioritetet që rajoni ka caktuar për veten e tij për këtë vit dhe më e rëndësishmja, SEPA - Zona e vetme e pagesave në euro, në mënyrë që nga dita e parë e vitit të ardhshëm mund të përfitojnë të gjithë qytetarët dhe bizneset e gjithë këtij rajoni. Kështu që plani i rritjes tashmë do të fillojë të sjellë rezultate ndërsa flasim”, tha ai.

Liderët e vendeve të rajonit, përfaqësues të Bashkimit Evropian dhe Shteteve të Bashkuara të Amerikës, do të diskutojnë Planin e Rritjes për Ballkanin Perëndimor.

Samiti po mbahet nën sloganin "Një rajon, vizion i përbashkët". Në takimin e liderëve rajonalë po marrin pjesë edhe komisionari Varhelyi, dhe ndihmës Sekretari i Shtetit për Evropën dhe Euroazinë, O'Brien.

Plani i Rritjes përfshin gjashtë miliardë euro grante dhe kredi për të përshpejtuar konvergjencën socio-ekonomike me BE-në - dy miliardë grante dhe katër miliardë kredi të buta të garantuara nga BE.

Kryeministri i Kosovës, Albin Kurti, nga Samiti BE-Ballkani Perëndimor që po mbahet në Mal të Zi ka kërkuar nga Serbia që të dorëzojë në Kosovë, terroristin Milan Radoiçiq dhe grupin e tij kriminal që e vranë rreshterin policor Afrim Bunjaku më 24 shtator në Banjskë të Zveçanit.

“Serbia ta dërgojë Radoiciqin në Kosovë dhe grupin e tij kriminal që vranë rreshterin policor, tashmë hero, Afrim Bunjaku”, ka deklaruar Kurti.

Ai tha se marrëdhëniet e mira në rajon janë të domosdoshme.

Kurti në panelin e diskutimit të Samitit që po mbahet në Kotorr “Situata aktuale dhe planet e së ardhmes – Plani i ri i rritjes”, theksoi se për Kosovën ky plan paraqet mundësi unike për të quar reformat e përpara.

Ai foli edhe për luftën në Ukrainë, e cila sipas tij ka sjellë shkatërrime në Ukrainë dhe ka shkaktuar kriza në Evropë.

Ndihmëssekretari i Byrosë për Çështje Evropiane dhe Euroaziatike i Departamentit të Shtetit Amerikan, James O’Brien, po merr pjesë në Samitin BE-Ballkani Perëndimor që po mbahet në Kotor.

O’Brien në samitin ku po diskutohet Plani i Rritjes tha se ShBA-ja e mbështet këtë plan, pasi ka të bëjë me 18 milionë njerëz dhe me të ardhmen e tyre.

“Më vonë, këtë vit, vendet që i përmbushin reformat do t’i bashkohen tregut unik evropian me çmime të ulëta. Pra, secilën herë që dikush dërgon para përmes bankës, do të ketë shpenzime më të vogla. Kjo ka të bëjë me përfitime për qytetarët e rajonit dhe bashkimin në tregun unik evropian”, tha O’Brien.

Më tej, O’Brien tha se ShBA-ja është e ngazëllyer që po e sheh lansimin zyrtar të kësaj nisme dhe se Shtetet e Bashkuara besojnë se është vitale për ta ndihmuar Ballkanin Perëndimor për t’i përmbushur potencialet e veta.

Kryeministri i Shqipërisë, Edi Rama, është shprehur “i zhgënjyer” që Mali i Zi, priti liderët me shi, dhe jo me diell, në Samitin BE-Ballkani Perëndimor.

Kështu e nisi fjalën e tij në konferencën e nisjes së këtij samiti i cili po mbahet në Kotor.

“Para se gjithash do të thosha që jam shumë i zhgënjyer që Mali i Zi nuk arriti të na mirëpresë me diell, por na mirëpriti me shi, por çdo gjë tjetër është në rregull”, u shpreh Rama.

Ai më pas tha se ky samit do të hapë shtigje të reja për të gjitha vendet, për t’u integruar në Bashkimin Evropian, në tregun unik të tij.

“Një proces shumë inspirues dhe udhëzues që do të hapë shtigje të reja për të gjitha vendet tona, për t’u integruar në Bashkimin Evropian, në tregun unik të BE-së dhe për të rritur tregtinë duke krijuar kështu mundësi të reja. Vetëm ideja që brenda këtij mund të sigurohemi që transferet financiare të qytetarëve tanë të vendeve tona do ta kenë më të lhetë, do të thotë që nuk do ta kenë barrën e shpenzimeve që kanë, është një gjë e mrekullueshme. Për të tjerat duhet të punojmë”, tha më tej kryeministri i Shqipërisë.

Kryeministri i Republikës së Kosovës, Albin Kurti në një deklarim për media para se të fillojë Samiti i Kotorrit, tha se Plani i Rritjes së BE-së është mundësi për Ballkanin Perëndimor.

Ai ka thënë se 25 vjet më parë ka qenë i burgosur politik dhe i luftës nga regjimi i Millosheviqit.

Kurti ka folur edhe për procesin e Berlinit që këtë vit shënon 10 vjetorin.

Shefi i ekzekutivit ka përmendur se Bosnja Hercegovina nuk ka miratuar marrëveshjen për lirinë e lëvizjes me letërnjoftime.

Çfarë synon paketa e BE-së prej 6 mld eurosh për Ballkanin Perëndimor

Paketa e cila përfshin 6 miliardë euro parashikon që vendet e Ballkanit Perëndimor do të marrin 2 miliardë euro në formën e parave pa interes dhe 4 miliardë euro në formën e kredive të buta.

Kjo është një prej paketave më ambicioze të Bashkimi Evropian për të ndihmuar rritjen ekonomike dhe reformat në gjashtë vendet e Ballkanit Perëndimor, në mënyrë që ato të ecin përpara më shpejt drejt integrimit në BE.

Por fjalën e fundit do ta japë Këshilli i BE-së. Pasi Parlamenti Evropian miratoi paketën, ajo duhet të ‘vuloset’ edhe nga Këshilli i BE-së. Pas kësaj, mund të fillojnë pagesat e para për përfituesit.

Plani i BE-së për Ballkanin Perëndimor synon rritjen ekonomike të rajonit, përshpejtimin e reformave dhe kryerjen e investimeve, bazuar në katër shtylla kryesore:

Rritja e integrimit ekonomik me Tregun Unik të Bashkimit Evropian.

Rritja e integrimit ekonomik brenda Ballkanit Perëndimor, përmes Tregut të Përbashkët Rajonal.

Përshpejtimi i reformave themelore

Rritja e ndihmës financiare

Për të zbatuar këtë plan, BE-ja ka propozuar një instrument të ri financimi: 6 miliardë euro në tre vitet e ardhshme për vendet e Ballkanit Perëndimor, duke kombinuar grantet me kreditë e buta.

Si do të funksionojë plani i rritjes ekonomike?

Mbështetja 6 miliardë euro nga Bashkimi Evropian për Ballkanin në periudhën 2024-2027, do të çelet pasi instrumenti të jetë miratuar edhe nga Këshilli Evropian.

3 miliardë euro (2 miliardë € grante dhe 1 miliard € kredi të buta) do të shkojnë për investime përmes Kornizës së Investimeve të Ballkanit Perëndimor (WBIF).

3 miliardë eurot e tjera, janë në formën e kredive të buta për qeveritë në Ballkanin Perëndimor, me kusht që ato të përmbushin Agjendat e Reformës.

Për të përfituar nga fondet, secili vend i Ballkanit Perëndimor do të duhet të përgatisë një Agjendë Reformash, në mënyrë të veçantë ato në fushën e rendit dhe të sundimit të ligjit.

Pagesat do të bëhen dy herë në vit, në bazë të kërkesave të paraqitura nga partnerët e Ballkanit Perëndimor dhe pas verifikimit nga Komisioni për arritjen e kushteve dhe parakushteve përkatëse të pagesës, si stabiliteti makro-financiar, menaxhimi i shëndoshë i financave publike, transparenca dhe mbajtja nën kontroll e buxhetit.

Nëse kushtet e pagesës nuk plotësohen, Komisioni pezullon ose zbret një shumë të caktuar nga fondi.

Secili prej 6 vendeve të Ballkanit Perëndimor, do të ketë 1-2 vjet kohë për të përmbushur kushtet, në të kundërt shuma do të rishpërndahet mes të tjerëve në vitet në vijim.

Me përthithjen e këtyre fondeve, në formën asistencës financiare për të ndihmuar reformat, ku 2 miliardë euro do të jenë grante dhe 4 miliardë euro kredi nga 2024 deri në 2027, Shqipëria, Bosnja, Kosova, Mali i Zi, Maqedonia e Veriut dhe Serbia do të mund të integrohen paraprakisht në tregun e përbashkët evropian, duke lehtësuar jetën e individëve dhe bizneseve rezidentë në secilin shtet.

Por çfarë do të përfitojnë konkretisht qytetarët?

Me integrimin në tregun e brendshëm evropian, vlerësohet se vetëm nga ndryshimi i regjimit të transaksioneve financiare që bëjnë qytetarët shqiptarë që jetojnë në shtetet Evropiane, siç janë dërgesat e parave për familjet e tyre dhe për sipërmarrjet e tyre të vogla në Shqipëri, parashikohet që ata të mund të kursejnë mbi 20 milion euro në vit.

Nga ana tjetër, janë miliona euro që bizneset e rajonit dhe shpenzojnë ndërkohë që janë jashtë konkurrencës me kompanitë evropiane, të cilat për të njëjtat gjëra nuk ka nevojë të bëjnë shpenzime të tyre sepse shfrytëzojnë mekanizmat që janë brenda tregut të Bashkimit Evropian.

Plani i ri parashikon fillimisht integrimin e Ballkanit Perëndimor në tregun e përbashkët, proces i cili do të varet nga përshtatja e vendeve të rajonit me rregullat e këtij tregu dhe paralelisht hapje e tregut të tyre në sektorët përkatës për vendet fqinje.

Hapja e tregut rajonal parashikohet të rrisë Prodhimin e Brendshëm Bruto (PBB) të Ballkanit Perëndimor me 10 për qind.

Reformat janë një tjetër hallkë e rëndësishme e planit, çka nënkupton sundimin e ligjit që ndihmon edhe në tërheqjen e investimeve të drejtpërdrejta të huaja dhe forcon stabilitetin rajonal. Dhe në fund do të aplikohet shpërndaja e asistencës financiare për të ndihmuar reformat, prej 6 miliardë eurosh.

Në kuadër të integrimit të rajonit, ka qenë edhe Procesi i Berlinit, një iniciativë e nisur në vitin 2015 që synoi rritjen e bashkëpunimit rajonal në Ballkanin Perëndimor dhe dhënien e ndihmës për integrimin e këtyre vendeve në Bashkimin Evropian.

Në vijim të saj, për të forcuar bashkëpunimin në rajon u ndërmor iniciativa tjetër “Ballkani i Hapur”, ku pjesë e saj u bënë vetëm Shqipëria, Serbia dhe Maqedonia e Veriut.

Çfarë ndodh pas miratimit?

Pasi të miratohen, gjashtë partnerët e Ballkanit Perëndimor do të ftohen të paraqesin agjendat e tyre individuale të reformave duke paraqitur reformat social- ekonomike dhe themelore që do të ndërmarrin për të nxitur rritjen dhe konvergjencën sipas Planit të Rritjes gjatë periudhës 2024- 2027. Konvergjenca ekonomike është një element thelbësor në afrimin e vendeve të Ballkanit Perëndimor me BE-në.

Aktualisht, BPV-ja mesatare për kokë banori i rajonit qëndron ndërmjet 30% dhe 50% të mesatares së BE-së. Integrimi me tregun e vetëm të BE-së ka qenë shtytësi kryesor i rritjes ekonomike për të gjitha vendet që iu bashkuan BE-së. Ndikimi pozitiv në BPV-në e një vendi dhe nivelet e të ardhurave që rrjedhin nga integrimi me tregun e vetëm të BE-së është demonstruar qartë në të kaluarën.

4 shtylla kryesore të planit

Rritja e integrimit ekonomik me Tregun Unik të Bashkimit Evropian;

Rritja e integrimit ekonomik brenda Ballkanit Perëndimor përmes Tregut të Përbashkët Rajonal;

Përshpejtimi i reformave themelore;

Rritja e ndihmës financiare.

Zbërthimi i 4 pikave

Rritja ekonomike

Pika e parë është rritja ekonomike që synon integrimin ekonomik me tregun e vetëm të BE-së, me kusht që Ballkani Perëndimor të përafrohet me rregullat e tregut të vetëm dhe hapja e fushave përkatëse për të gjithë fqinjët e tyre në të njëjtën kohë, në përputhje me Tregun e Përbashkët Rajonal.

“Fushat kryesore janë lëvizja e lirë e mallrave, shërbimeve dhe punëtorëve, zona e vetme e pagesave në euro, transporti, energjia dhe tregu i vetëm digjital”, thuhet në dokument.

Nxitja e integrimit

Nxitja e integrimit ekonomik brenda Ballkanit Perëndimor nëpërmjet Tregut të Përbashkët Rajonal, është një tjetër çështje që përfshihet në plan, bazuar në rregullat dhe standardet e BE-së, të cilat potencialisht mund të shtojnë 10% në ekonomitë e tyre.

Përshpejtimi i reformave

Plani ka të bëjë edhe me përshpejtimin e reformave themelore, mbështetja e rajonit drejt anëtarësimit në BE, përmirësimi i rritjes së qëndrueshme ekonomike, duke përfshirë tërheqjen e investimeve të huaja dhe forcimin e stabilitetit rajonal.

Rritja e ndihmës financiare

Rritja e ndihmës financiare ka si qëllim për të mbështetur reformat themelore. Instrumenti prej 6 miliardë eurosh përbëhet nga 2 miliardë euro grante dhe 4 miliardë euro kredi koncesionare, me pagesë të kushtëzuar nga përmbushja e reformave specifike nga partnerët e Ballkanit Perëndimor.

Plani i Rritjes bazohet në Planin Ekonomik dhe Investues prej 30 miliardë eurosh, i nisur që në vitin 2020.