Gjykata e Lartë në ShBA vendosi të premten në mënyrë unanime që zyrtarët publikë ndonjëherë mund të paditen për bllokimin e kritikëve të tyre në mediat sociale, një çështje që u ngrit fillimisht për gjykatën e lartë në një çështje që përfshinte presidentin e atëhershëm amerikan, Donald Trump.
Gjyqtarja Amy Coney Barrett, duke shkruar për gjykatën, tha se zyrtarët që përdorin llogari personale për të bërë deklarata zyrtare, mund të mos jenë të lirë t’i fshijnë komentet në lidhje me ato deklarata ose t’i bllokojnë kritikuesit krejtësisht.
Nga ana tjetër, Barrett shkroi: “Zyrtarët shtetërorë kanë jetë private dhe të drejtat e tyre kushtetuese”.
Gjykata vendosi në dy raste që përfshinin padi të ngritura nga njerëz që u bllokuan pasi kishin lënë komente kritike në llogaritë e mediave sociale që i përkisnin anëtarëve të bordit të shkollave në Kaliforninë Jugore dhe një menaxheri të qytetit Port Huron, Michigan, në verilindje të Detroitit.
Ato janë të ngjashme me një rast që përfshin Trumpin dhe vendimin e tij për të bllokuar kritikuesit nga llogaria e tij personale në Twitter, e njohur tashmë si X. Gjyqtarët e hodhën poshtë çështjen pasi Trumpi u largua nga detyra në janar të vitit 2021.
Rastet e detyruan gjykatën të merrej me të drejtat konkurruese të fjalës së lirë të zyrtarëve publikë dhe zgjedhësve të tyre, të gjitha në një botë virtuale që po evoluon me shpejtësi.
Gjykatat e apelit në San Francisko dhe Cincinnati kishin marrë vendime kontradiktore se kur llogaritë personale bëhen zyrtare dhe gjykata e lartë nuk e pranoi asnjërin nga vendimet, duke i kthyer çështjet në gjykatat e apelit për të zbatuar standardin që gjyqtarët parashtruan të premten.
“Kur një zyrtar qeveritar poston për tema të lidhura me punën në mediat sociale, mund të jetë e vështirë të thuhet nëse fjalimi është zyrtar apo privat”, tha gjyqtarja Barrett.
Zyrtarët duhet të kenë autoritetin të flasin në emër të qeverive të tyre dhe të synojnë ta përdorin atë që postet e tyre të konsiderohen në thelb si ato të qeverisë, shkroi Barrett. Në raste të tilla, ata duhet të lejojnë kritikat, ose rrezikojnë të paditet, ka shkruar ajo.
