Violetta Berisha është kryetarja e parë shqiptare-amerikano e Bashkisë Fairview në Nju Xhersi – SHBA, ka njoftuar shefi i misionit në Konsullatën e Përgjithshme të Kosovës në Nju Jork Blerim Reka.
Reka, i cili ka marrë pjesë në ceremoninë e inaugurimit të Violetta Berishës, u shpreh se ajo na bëri krenarë gjithë shqiptarëve.
“Mbrëmë në ceremoninë e betimit solemn të prefektes së Fairvieë, Violetta Berisha, të parës shqiptaro-amerikane në krye të qytezës në historinë e saj 139- vjeçare. Në praninë e guvernatorit të Nju Xhersit, Phil Murphy, kongresistit Bill Pascrell, e zyrtarëve të lartë të këtij shteti amerikan, Violetta na bëri krenarë gjithë shqiptarëve”, ka shkruar Reka.
Presidenti i Shqipërisë Bajram Begaj, ka uruar Violetta Berishën, me origjinë nga Puka, duke e cilësuar si një moment historik për shqiptarët në SHBA.
“Urime Violetta Berisha për betimin si kryetare e Bashkisë së Fairview, Nju Xhersi. Ky është një moment historik jo vetëm për të, por edhe për komunitetin shqiptar në SHBA. Suksesi i saj si gruaja e parë shqiptare që merr një detyrë të tillë është një model frymëzimi dhe krenarie”, ka shkruar Begaj në Facebook. /tch
