Federata Shqiptare e Atletikës ka zhvilluar në stadiumin “Elbasan Arena” aktivitetin e Kupës së Shqipërisë, një kompeticion ku morën pjesë 12 skuadra nga e gjithë Shqipëria. Një aktivitet në përgjithësi me një nivel të mirë, por në fund nuk pati asnjë rekord kombëtar të thyer.
Tirana u shpall fituese e Kupës së Shqipërisë për femra, ndërkohë që sportistja më e mirë e aktivitetit është shpallur atletja e këtij ekipi Luiza Gega. Në vendin e dytë u rendit Skënderbeu e më pas Partizani.
Te meshkujt, fitues i Kupës së Shqipërisë doli ekipi i Vllaznisë, që la pas Skënderbeun dhe Teutën.
Ndërsa sportisti më i mirë i këtij aktiviteti u shpall atleti shkodran Endri Rakaj.
Për t’u veçuar fakti se në këtë aktivitet bëri debutimin e saj me skuadrën e Tiranës edhe atletlja kubaneze Yipsi Moreno. Ajo është kampione Olimpike dhe Botërore me këtë shtet në disiplinën e hedhjes së çekiçit, por sipas FSHA pritet që së shpejti ajo të përfaqësojë Shqipërinë. Moreno, 43 vjeçe, fitoi si në këtë disiplinë ashtu dhe atë të diskut.
