Ushtria izraelite është gati të evakuojë civilët palestinezë nga Rafah dhe të sulmojë qendrat e Hamasit në qytetin jugor të Rripit të Gazës, tha të mërkurën një zyrtar i lartë izraelit i mbrojtjes, pavarësisht paralajmërimeve ndërkombëtare për katastrofë humanitare.
Një zëdhënës i qeverisë së kryeministrit, Benjamin Netanyahu, tha se Izraeli “po shkonte përpara” me një operacion tokësor, por nuk dha asnjë afat kohor.
Zyrtari i mbrojtjes tha se Ministria e Mbrojtjes e Izraelit kishte blerë 40,000 tenda, secila me kapacitet për 10 deri në 12 persona, për të strehuar palestinezët e zhvendosur nga Rafah përpara një sulmi.
Një burim i qeverisë izraelite tha se kabineti i luftës i Netanyahut planifikoi të takohet në dy javët e ardhshme për të autorizuar evakuimin e civilëve, që pritet të zgjasë rreth një muaj, shkruan Reuters.
