LIVE: E thotë Medvedev, “Zelensky është shënjestra legjitime ushtarake”

Dmitry Medvedev, nënkryetari i Këshillit të Sigurimit të Rusisë, i tha medias shtetërore TASS më 20 maj se Presidenti Volodymyr Zelensky është një "objektiv legjitim ushtarak".

Medvedev, i cili më parë shërbeu si president i Rusisë nga viti 2008 deri në vitin 2012, ka përdorur rregullisht gjuhë luftarake në një përpjekje për të frikësuar Perëndimin dhe Ukrainën.

Në shkurt, Medvedev kërcënoi se Rusia do të përdorte armë bërthamore kundër SHBA-së, Britanisë së Madhe, Gjermanisë dhe Ukrainës nëse Moska humbte kontrollin e të gjithë territorit të Ukrainës që aktualisht pushton.

"(Zelensky) tashmë drejton një regjim politik armiqësor ndaj Rusisë, i cili po bën luftë kundër nesh," tha Medvedev.

“Dhe liderët e vendeve që bëjnë luftë konsiderohen gjithmonë një objektiv legjitim ushtarak”.

Medvedev e kishte portretizuar më parë veten si një liberal, por është bërë një nga skifterët më agresivë pro-luftës të Rusisë që nga fillimi i pushtimit të plotë të Ukrainës në vitin 2022. Ai ka luajtur gjithnjë e më shumë rolin e luajtur më parë nga politikani i ndjerë Vladimir Zhirinovsky, i famshëm për retorikë flakëruese dhe agresive.

Zelensky thuhet se shmangi disa tentativa për vrasje në fillim të pushtimit në shkallë të plotë.

Shërbimi i Sigurisë së Ukrainës (SBU) tha gjithashtu më herët në maj 2024 se kishte zbuluar një rrjet agjentësh të Shërbimit Federal të Sigurisë së Rusisë (FSB) të cilët po planifikonin të vrisnin Zelensky dhe zyrtarë të tjerë të rangut të lartë në Ukrainë.

Beteja për Kharkivin i ka kushtuar ushtrisë së Vladimir Putin rreth 1200 trupa, në vetëm 24 orët e fundit. Mediat ndërkombëtare raportojnë se ushtarë të shumtë rusë vdiqën gjatë ofensivës së tyre, përgjatë kufirit për të pushtuar qytetet strategjike ushtarake.

Përveç humbjes së trupave, 16 tanke të tjera dhe 48 sisteme artilerie ruse u shkatërruan nga forcat ukrainase. Por pavarësisht humbjeve të shumta në fushën e betejës, forcat ruse po përparojnë në qytetin e dytë më të madh të Ukrainës.

Kharkivi është nën bombardime të vazhdueshme nga artileria e Moskës, si dhe raketat e sulmet me dron.

Më shumë se 10.000 banorë të Kharkivit tashmë janë evakuuar. Ndërkohë, 50.000 nga trupat e Rusisë janë mbledhur në kufirin pranë qytetit, por ekspertët thonë se atij do t'i duhet më shumë për një sulm dhe pushtim në shkallë të plotë.

Ukraina sakaq ka goditur Krimenë me dronë duke fundosur një minahedhës të Flotës ruse në Detin e Zi. Ata gjithashtu shënjestruan dhe hodhën në erë një rafineri të madhe ruse të naftës në Tuapse, nëpërmjet një sulmi me dron kamikaz.

Pesë vite më parë, kur Volodymyr Zelensky vendosi të linte karrierën e tij si komedian për t’u bërë president i Ukrainës, nuk e dinte se shumë shpejt do të merrte dhe detyrën e gjeneralit të luftës.

Në vitin 2019, Zelensky, një komedian pa përvojë politike, konkurroi kundër presidentit të atëhershëm, Petro Poroshenko, dhe fitoi raundin e dytë të zgjedhjeve me 73 për qind të votave.

Ai erdhi në politikë si një rishtar politik, i cili ka pasur një humor antiestablishment mes ukrainasve, të cilët më pas vendosën se ishin ngopur me politikanët ekzistues. Më 20 maj 2019, Zelensky u betua në parlamentin e vendit.

Zgjedhjet e ardhshme do të mbaheshin në mars të këtij viti, por votimi është shtyrë për një kohë të pacaktuar për shkak të luftës. Ajo që mbetet e pasigurt ende, është perspektiva për të arritur një marrëveshje paqeje me Rusinë pas dy vitesh luftë.

Që kur Rusia nisi pushtimin e saj në shkallë të gjerë më 24 shkurt 2022, Zelensky është bërë një figurë e njohur në skenën ndërkombëtare, duke bërë thirrje për mbështetje dhe më shumë armë për të mbrojtur vendin e tij në luftë.

Duke refuzuar të largohej nga Kievi në shpërthimin e luftës, Zelensky fitoi mjaft popullaritet e mbështetje dhe mes ukrainasve. Ndërsa lufta filloi në vitin e tretë, mbështetja për presidencën ka rënë, por sipas Institutit Ndërkombëtar të Sociologjisë në Kiev, miratimi i tij si president është stabilizuar në 60-65%.

Anton Hrushetskyi, Drejtor Ekzekutiv i Institutit tha se situata në fushën e betejës dhe lufta kundër korrupsionit janë dy faktorët kryesorë që kanë ndikuar në opinionin publik.

Sipas Hrushetskyi, shumica e ukrainasve – nga 70 në 80 përqind – ishin të mendimit se ishte e drejtë të mos mbaheshin zgjedhje gjatë kohës së luftës dhe Zelensky mbeti një kryetar legjitim i shtetit.

Vetë Reuters në një anketim të tij thotë se nëse do të kishte zgjedhje ukrainasit do të votonin për Zelensky, duke shtuar se besonin se ai do ta çonte me sukses luftën deri në fund.

Volodymyr Krivetskyi, i cili votoi për rivalin e Zelensky, Petro Poroshenko, në vitin 2019, tani po shet dhurata me temën e presidentit të Ukrainës. Ai thotë se "këto nuk janë thjesht suvenire, por ato kanë kuptim". Ai thotë se gjatë pushtimit, presidenti nuk u largua dhe qëndroi në Kiev duke e quajtur një plus të madh për të. "Ai mund të kishte shpëtuar, por qëndroi dhe nuk e braktisi kurrë Ukrainën. Bota e respekton", thotë ai.

Ekziston një besim në rritje se Polonia së shpejti do të ketë ushtrinë më të fortë të Evropës. Qeveria polak nuk ka humbur asnjë mundësi për ta shpërndarë këtë mesazh “në shtëpi”, dhe gjithnjë e më shumë dëgjohet se po i bën jehonë edhe jashtë vendit. Por a është e vërtetë?Në përgjigje të luftës së Rusisë në Ukrainë, qeveria e Polonisë ka nisur atë që duket si një program i madh riarmatimi.

Megjithatë, pavarësisht nga të gjitha planet e shpallura për të blerë armatime më të fundit nga Shtetet e Bashkuara dhe Koreja e Jugut, duket se shumë pak është menduar se si të planifikohet mbrojtja e vendit. Megjithatë, përparimi i saj është vlerësuar tej mase, duke u konsideruar edhe superfuqi, që mund të kalojë Gjermaninë apo të rivalizojë denjësisht Rusinë.

Investimi marramendës

Polonia po investon rreth 2.5 miliardë dollarë për të forcuar sigurinë dhe parandalimin në kufirin e saj me Rusinë dhe aleatin e saj Bjellorusinë, tha të shtunën kryeministri Donald Tusk, shkruan APNews.

Tusk tha se puna për projektin Shield-East, i cili përfshin ndërtimin e fortifikimeve të vërteta ushtarake, tashmë ka filluar. Polonia është në krahun lindor të NATO-s dhe Bashkimit Evropian dhe Tusk theksoi se ajo mban përgjegjësi shtesë për sigurinë e Evropës.

"Ne kemi vendosur të investojmë rreth 10 miliardë zloty (2.5 miliardë dollarë) në sigurinë tonë dhe mbi të gjitha në një kufi të sigurt lindor," tha Tusk.

“Ne po nisim një projekt të madh për të ndërtuar një kufi të sigurt, duke përfshirë një sistem fortifikimesh dhe formësimi të terrenit, i cili do ta bëjë atë kufi të padepërtueshëm për një armik të mundshëm”, tha Tusk .

“Ne filluam këto punime për ta bërë kufirin polak të sigurt në kohë paqeje dhe të padepërtueshëm për armikun në kohë lufte”, shtoi ai.

Ndihma për Ukrainën

Ai foli me ushtarët polakë në Krakov me rastin e përkujtimit të 80-vjetorit të fitores së Aleatëve në Betejën e Monte Cassino kundër nazistëve gjatë Luftës së Dytë Botërore.

Qeveria e mëparshme e krahut të djathtë të Polonisë ndërtoi një mur prej 400 milionë dollarësh në kufirin me Bjellorusinë për të ndaluar një fluks të madh emigrantësh, por qeveria aktuale pro-evropiane thotë se ai duhet të forcohet. Polonia një aleat besnik i Ukrainës në luftën e saj mbrojtëse kundër pushtimit rus, shkruan APNews.

Gjermania deri më tani i ka dërguar Kievit ndihma ushtarake me vlerë 17.1 miliardë euro, më shumë se çdo vend tjetër evropian. Britania është në vendin e dytë me 6.6 miliardë euro dhe Polonia është e treta me tre miliardë euro, ndërsa Franca deri më tani i ka dërguar Ukrainës ndihma me vlerë 500 milionë.

Rritja e shpejtë

Sakaq, në lindje, polakët po ndërtojnë një ushtri që është në rrugën e saj për t'u bërë forca më e madhe tokësore në BE. Polonia tashmë ka më shumë tanke dhe obusa se Gjermania dhe qëllimi është deri në vitin 2035 të ketë 300,000 trupa, krahasuar me 170,000 trupa aktuale të Gjermanisë.

Përveç forcimit të prodhimit të tyre ushtarak, polakët porositën më shumë se njëqind sisteme të fuqishme raketash HIMARS nga amerikanët dhe nënshkruan një kontratë me kompaninë koreano-jugore Hanwha për blerjen e 288 raketave vetëlëvizëse me shumë fuçi. që mund të lëshojë disa raketa të ndryshme artilerie të drejtuara ose të padrejtuara. Kësaj duhet t'i shtohen 116 tanke Abrams.

Forcat Ajrore Polake janë të pajisura me F-16 amerikanë dhe në vitin 2020, Varshava nënshkroi një kontratë me SHBA-në për 32 luftëtarë F-35 plus blenë 48 avionë të tjerë të Koresë së Jugut FA-50.

Ekuilibrat e pushtetit

Si ushtria më e fortë në Evropë, Polonia do të jetë më se e aftë për të mbrojtur veten dhe shtetet baltike me atë që do të marrin, duke supozuar se investimi do të përfundojë.Kjo ka të ngjarë ta vendosë vendin në një pozicion të ri brenda Evropës dhe NATO-s. Ka shumë të ngjarë që Polonia të bëhet fuqia kryesore ose dytësore e Evropës kontinentale pas Francës.

Pozicioni i ri i Polonisë brenda NATO-s dhe Evropës do t'i shtyjë vendet si Britania e Madhe ose Franca të pyesin nëse ia vlen të kenë edhe forcat e tyre tokësore si përparësi, ose nëse ata duhet të kthehen në specialitetin e tyre natyror.

Shtetet e Bashkuara dhe Europa po bashkohen rreth një plani për të përdorur asetet e ngrira ruse për t’ia dhënë Ukrainës që do të përdoret për ndihmë ushtarake dhe ekonomike, duke i ofruar vendit një mundësi shpëtimi prej miliarda dollarësh. Kështu shkruan Neë York Times duke cituar sekretaren amerikane të Thesarit.

Janet Yellen shpjegoi se disa opsione mbeten në tryezë për përdorimin e 300 miliardë dollarëve.

Por ajo tha se ideja më e mirë është që vendet e G7 t’i japin një kredi Kievit të mbështetur nga fitimet dhe interesat e fituara në asetet ruse të ngrira në Europë. Ministrat e financave të G7 do të takohen në Itali këtë javë me shpresën për të finalizuar një plan që ata mund t’ua dorëzojnë krerëve të shteteve përpara samitit të liderëve në qershor.

“Unë mendoj se shohim interes të konsiderueshëm midis të gjithë partnerëve tanë për një formë kredie që mund të na ndihmojë,” tha Yellen.

“Do të gjeneronte një sasi fillestare të konsiderueshme që do të ndihmonte në plotësimin e nevojave që ne presim që Ukraina të ketë si ushtarakisht ashtu edhe në rindërtimin e vendit.”

Ukraina ka thënë se i ka rrëzuar të gjithë 29 dronët kamikazë, të llojit Shahed, me të cilën Rusia e sulmoi Harkivin mëngjesin e së hënës.

Forcat e Armatosura të Ukrainës thanë se Rusia e lëshoi edhe një raketë balistike Iskandar-M, por nuk treguan nëse ajo është zmbrapsur.

Ky sulm u mbraps një ditë pasi 11 njerëz u vranë nga sulmet ruse në ofensivën e Moskës në rajonin e Harkivit, sipas zyrtarëve.

Cak i sulmeve me dronë ishin edhe rajonet Odesa, Mikolaiv, Poltava dhe Lviv, sipas Forcave të Armatosura.

Gjashtëmbëdhjetë dronë u rrëzuan mbi rajonin lindor Mikolaiv, ku një shtëpi banimi u kaplua nga flaka si pasojë e copëzave të dronëve të rrëzuar, tha guvernatori i këtij rajoni.

Tre dronë të tjerë u rrëzuan mbi rajonin perëndimor Lviv, ku nuk u raportua për dëme nga zyrtarët lokalë.

Këtë pranverë, Rusia i ka rritur sulmet me dronë dhe raketa nëpër Ukrainë, duke i shkaktuar dëme të mëdha infrastrukturës së saj energjetike.

Forcat ukrainase i rrëzuan të gjithë 90 dronët e llojit Shahed që Rusia i lëshoi në javën e fundit, tha zëdhënësi i ushtrisë ukrainase, Dmytro Lykhoviy./REL

Rusia thotë se rrëzoi 60 dronë dhe disa raketa mbi territorin e saj, ndërsa Ukraina tha se shkatërroi 30 dronë rusë. Njoftohet për të paktën katër të vrarë në një sulm në periferi të Kharkivit, ndërsa Rusia vazhdon ofensivën e ripërtërirë në verilindje të Ukrainës, të shkatërruar nga lufta.

Mbrojtja ajrore ruse rrëzoi 57 dronë ukrainas mbi rajonin jugor të Krasnodarit gjatë natës, tha Ministria e Mbrojtjes e Rusisë.

Zyrtarët lokalë ushtarakë thanë se copat e dronëve të goditur ranë mbi një rafineri nafte në qytetin Slavyansk-on-Kuban, por nuk pati zjarr apo dëme.

Por rrjeti i lajmeve Astra publikoi video ku shihej një shpërthim në rafineri teksa goditej nga një dron. Pamjet filmike nuk mund të verifikoheshin në mënyrë të pavarur.

Nëntë raketa balistike me rreze të gjatë dhe një dron u shkatërruan mbi Krimenë e pushtuar nga Rusia, pas sulmit masiv ukrainas me dron të premten që shkaktoi ndërprerje të energjisë në qytetin e Sevastopolit.

Tre dronë të tjerë u rrëzuan mbi rajonin Belgorod, i cili kufizohet me Ukrainën. Sipas guvernatorit rajonal Vyacheslav Gladkov, çatia e një kishe u dogj nga rënia e mbeturinave të dronëve, por nuk pati viktima.

Në rajonin e Khersonit, pjesërisht të pushtuar nga forcat ruse, guvernatori i vënë nga Kremlini, Vladimir Saldo, tha se një person vdiq dhe 16 u plagosën kur një dron ukrainas goditi një automjet të dielën në mëngjes.

Forcat ajrore ukrainase thanë se rrëzuan të 37 dronët rusë të lëshuar kundër gjatë natës kundër Ukrainës.

Në rajonin e Kharkivit, ku Moska nisi kohët e fundit një ofensivë të re, guvernatori rajonal Oleh Syniehubov tha të dielën në mëngjes se një person vdiq dhe 11 u plagosën si rezultat i bombardimeve të një dite më parë. Ai tha të dielën se katër persona u vranë dhe 15 u plagosën në një sulm rus në periferi të kryeqytetit rajonal.

Rusia nisi një ofensivë në rajonin e Kharkivit në fund të javës së kaluar, duke shtuar ndjeshëm trysninë mbi forcat më të pakta ukrainase. Ukraina është në pritje të dërgesave të vonuara të armëve dhe municioneve nga partnerët e saj perëndimorë, thelbësore për luftën e saj kundër agresionit rus.

Numri i viktimave nga sulmi rus në Kharkiv është rritur në 11 ndërsa shumë të tjerë raportohen të plagosur.

Ushtria ruse goditi një vendpushim buzë një liqeni në qytetin e dytë më të madh të Ukrainës të dielën, si dhe sulmoi gjithashtu fshatrat përreth.

Prokurorët thanë se gjashtë persona u vranë në zonën turistike. Sulmi i parë u pasua nga një goditje e dytë pak minuta më vonë, duke synuar ekipet e emergjencës në vendin e ngjarjes.

Presidenti Volodymyr Zelenskiy u bëri thirrje përsëri aleatëve perëndimorë që të furnizojnë Kievin me sisteme shtesë të mbrojtjes ajrore për të mbrojtur Kharkivin dhe qytetet e tjera.

“Bota mund të ndalojë terrorin rus – dhe për ta bërë këtë, mungesa e vullnetit politik midis liderëve duhet të tejkalohet”, shkroi Zelensky në Telegram.

Finlanda mund të hapë një pikë kontrolli në kufirin me Rusinë pasi të miratohet një ligj i ri për dëbimin, tha kryeministri finlandez Petteri Orpo.

“Pasi të miratohet ligji, ne do të përpiqemi të hapim kufirin me kujdes. Do të përpiqemi të hapim trafikun përtej kufirit. Mund të përpiqemi të fillojmë me një pikë kontrolli. Dhe nëse vendoset bashkëpunimi në të dy anët e kufirit, do të jetë është e mundur të hapen pika të tjera kontrolli”, tha ai në një intervistë.

Kryeministri i Finlandës prezantoi të dhënat e inteligjencës që tregojnë se situata në kufi nuk ka ndryshuar.

Një projekt-ligj për deportimin e azilkërkuesve në Rusi do të shqyrtohet nga parlamenti finlandez javën e ardhshme.

Më 4 prill, qeveria finlandeze vendosi që të gjitha pikat e kontrollit në kufirin me Rusinë të mbeten të mbyllura për një kohë të pacaktuar për shkak të fluksit të pakontrolluar të refugjatëve nga vendet e treta.