Dinamo do të përballet pasditen e sotme përballë Laçit, në sfidën e vlefshme për javën e 33-të të “Abissnet Superiore”.
Kjo ndeshje që do të zhvillohet në stadiumin “Elbasan Arena”, do të startojë në orën 18:00.
Një ndeshje mjaft interesante, me të dy ekipet që duan rikthimin te fitorja. Dinamovitët vijnë pas humbjes në derbi 2-0 përballë Partizanit, ndërsa në krahun tjetër, Laçi u mposht nga Egnatia me përmbysje, me rezultatin 1-2.
Pavarësisht se të dyja ekipet kërkojnë 3 pikëshin, objektivat e tyre janë të ndryshëm.
Skuadra e Dritan Mehmetit është në ‘luftë’ për një vend në Final 4, duke u renditur në vendin e 5-të me 46 pikë, po aq sa Tirana e vendit të katërt.
Por kurbinasit nuk kanë të njëjtin objektiv. Pikët për Laçin janë jetike, pasi duan sa më shpejt shkëputjen nga zona “Play Out”. Skuadra e drejtuar nga Armando Cungu është në vendin e 7-të me 38 pikë, po aq sa Teuta e vendin të 8-të e cila ndodhet në zonën e ftohtë të renditjes.
