Erbim Fagu, përtej humbjes në derbi, që gjithsesi “djeg”, sheh edhe anë pozitive te loja e Tiranës së tij. Trajneri i bardhebluve ka besim të plotë për praninë e Tiranës në “Final 4”.
“Më vjen keq për humbjen sot, mendoj që kemi zhvilluar një ndeshje të mirë. Shpresoj shumë që në këto 3 ndeshje që kanë mbetur të dhurojmë këtë paraqitje për të arritur objektivin që kemi.”
Presioni në derbi: “Presioni në ndeshjet derbi është i pranishëm, u munduam ta menaxhonim këtë pjesë, mbas kartonit të kuq, na u prishën shumë ekuilibrat dhe ishim të pafat. Patëm lodhje fizike për shkak edhe të ndeshjes së Kupës, në momentet e golave, duhet të ishim më të përqendruar, më në bllok, për fat të keq pësuam gol.
Ndikimi i kartonëve të verdhë: “Kishim një plan B, por u kushtëzuam shumë nga kartonët e verdhë që morëm dhe ndryshuam disa herë zëvendësimet që kishim për të bërë. Në çdo faull që ne shkaktonim merrnim karton të verdhë. Kjo na kushtëzoi në zëvendësimet, u munduam të hiqnim lojtarët me të verdhë, për të mos e pësuar. Lodhja fizike e ditës së mërkurë na kushtëzoi shumë.”
Objektivi “Final 4”: “Duhet të fitojmë 3 ndeshjet që na kanë mbetur, nuk ka rrugë tjetër. Unë kam shumë besim, në ndeshjet e fundit kemi luajtur shumë mirë, kemi krijuar raste, kemi qenë në stabilitet. Në 3 ndeshjet e fundit do të japim gjithçka për gjithçka, nuk kemi çfarë të humbim”.
