Referuar raportimeve të medieve, në Gjermani, të gjithë janë të zemëruar me gjyqtarin Szymon Marciniak për golin e anuluar të de Ligt në fundin e ndeshjes Real Madrid-Bayern Munich.
Ndërsa ka reaguar pas ndeshjes, Jan-Christian Dreesen, CEO i klubit bavarez, u shpreh arbitri duhej ta kishte lejuar vazhdimin e lojës dhe nëse dyshonte për pozicion rasti duhej verifikuar në VAR.
“Ky është fjalimi im më i vështirë deri më sot. Ishte një humbje e dhimbshme. Skuadra dha gjithçka, sakrifikoi dhe luftoi aq shumë. Ëndrra jonë e madhe ishte për të kurorëzuar një sezon jashtëzakonisht pozitiv të Champions League me një finale gjermane në “Wembley”.
Neuer na shpëtoi dhe na mbajti në lojë për 85 minuta me pritje të pabesueshme. Davies shënoi me këmbën e djathtë, diçka që e bën rrallë. Më pas pësuam dy gola dhe në fund të ndeshjes u krijua kjo situatë. Arbitri duhet të kishte lejuar vazhdimin e lojës dhe më pas ta rishikonte atë me VAR.
Ne nuk duam të jemi humbës të këqij, por ky vendim na duket i gabuar dhe për këtë arsye është edhe më i hidhur”-deklaroi Dreesen.
