Sot (e shtunë) është në orar për t’u zhvilluar xhiro e fundit, përkatësisht java e 36-të në Albi Mall Superligën e Kosovës, duke mbyllur kështu edicionin 2023/24.
Edicioni 2023/24 në Superligën e Kosovës është mbyllur jo zyrtarisht pasi Ballkani ka fituar tashmë titullin kampion për herë të tretë radhazi.
Në anën tjetër, Liria dhe Fushë Kosova kanë rënë edhe matematikisht në Ligën e Parë, disa javë para fundit.
Edhe ekipet që do të shkojnë në garat evropiane dihen tashmë, por në garë është ende pozita e barazhit, ku luftojnë dy skuadra.
Në Klinë, Gjilani do të synojë fitoren ndaj Dukagjinit për të qëndruar në pozitën e shtatë, ndërsa Feronikeli synon fitore në udhëtim te Fushë Kosova dhe pret gabimin e gjilanasve për t’i ikur barazhit.
Në ndeshjet tjera, Ballkani pret Prishtinën, Drita është nikoqire e Malishevës, ndërsa Llapi luan në udhëtim te Liria.
Të gjitha ndeshjet pritet të fillojnë nga ora 15:00.
