Turneu final i Kupës së Republikës së Kosovës në hendboll ishte moment i duhur për të nderuar dy prej personaliteteve më të rëndësishme të hendbollit dhe sportit pejan në përgjithësi.
"Të dielën, në ditën e ndeshjeve finale, Federata e Hendbollit e Kosovës me mirënjohje ka nderuar Agim Kelmendin e Izedin Zekën. Të dy janë nderuar për kontributin e madh dhe për shumë dekada për hendbollin.
Kelmendi është kontribues te Besa për plot pesë dekada. Është shquar vazhdimisht si aktivist, përkatësisht anëtar i kryesisë së Besës, ndërsa për një mandat ishte edhe anëtar i Bordit të Federatës së Hendbollit të Kosovës.
Izedin Zeka është prej emrave më të mëdhenj të hendbollit të Pejës. Ishte lojtar i dalluar i klubit pejan, ndër të tjera edhe në periudhën e pavarësimit. Zeka ka qenë dhe është i përfshirë edhe në sporte të tjera.
Mirënjohjet për dy personalitetet e veçanta i ndau Izet Gjinovci, sekretar i përgjithshëm i Federatës së Hendbollit të Kosovës.
FHK-ja vazhdimisht ndan mirënjohje dhe çmon kontributin e personaliteteve që kanë kontribuar gjatë periudhave të ndryshme në zhvillimin e hendbollit në vendin tonë", njofton FHK.
