Rastet e të shtënave me armë në vendin tonë janë goxha të shpeshta dhe shpeshherë përfundojnë me plagosje. Pothuajse në të gjitha rastet të dyshuarit mbajnë armë ilegale, të cilat i përdorin me të madhe, duke cenuar edhe sigurinë e qytetarëve. Një rast i tillë ka ndodhur sot në Istog.
Këtë herë, të shtënat janë dëgjuar në fshatin Carallukë, ku një 21-vjeçar gjuajti me armë nga shtëpia e tij, duke trazuar banorët në atë pjesë.
Media mëson ekskluzivisht se i dyshuari është: Agnes Ajrizaj.
Ky i fundit, siç merr vesh Gazeta Sinjali, ka shkrepur armën e gjatë disa herë nga shtëpia e tij, për motive akoma të panjohura.
Posa rasti është denoncuar, njësitë policore kanë intervenuar në vendin e ngjarjes, ku edhe është kryer bastisje.
Arma që dyshohet se është përdorur nga i riu është konfiskuar, ndërsa i dyshuari është arrestuar dhe shoqëror në stacion policor për intervistim.
Ndaj tij, Prokurori i Shtetit ka urdhëruar masën e ndalimit policor dhe inicimin e rastit.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
