Tenxherja ekspres ka lehtësuar zierjen e gjellëve dhe është bërë aparat i adhuruar në kuzhinë, pa të cilën sot nuk mund të imagjinohet përgatitja e disa mjeshtërive kulinare
Pos që kursen kohën dhe paratë, shpejton procesin e përgatitjes, tenxherja ekspres gjithashtu ruan shijen, aromën dhe vlerat ushqyese të artikujve.
Dhe për të qenë dreka nga tenxherja e shijshme, me rastin e zierjes përmbajuni këtyre këshillave:
Përbërësit e gjellës në tenxhere do të duhej të plotësonin dy të tretat e vëllimit, ndërkaq artikujt të cilët krijojnë shkumë (orizi, perimet) vetëm gjysmën.
Kurrë nuk duhet të vendosni tenxheren bosh në shporetin e nxehur. Kapaku patjetër duhet të jetë mirë i mbyllur. Koha e zierjes llogaritet nga momenti kur shfaqet avulli në ventilin sigurues (rreth 10 minuta).
Kur kalon koha e caktuar për përgatitjen e disa artikujve (bishtajoret 8 – 10 minuta, perimet e grira 5 – 10, mishi i viçit 9 – 12, mishi i ngrirë 30-35…), duhet pritur disa minuta që të ulet shtypja në tenxhere dhe vetëm atëherë të hapet.
Natyrisht, çdo prodhues do të theksojë edhe rregulla plotësuese dhe udhëzime të cilave duhet t’u përmbaheni, andaj më së miri është që t’i studioni mirë para se të filloni të zieni artikuj në tenxheren ekspres.
Edhe disa vërejtje:
Mos e vendosni tenxheren ekspres në furrë të nxehur, sepse mund të dëmtoni pjesët plastike dhe të gomës dhe sistemet e sigurisë.
Para çdo përdorimi të tenxheres ekspres gjithmonë sigurohuni a janë në rregull sistemet e sigurisë, pa kurrfarë dëmtimesh, dhe a janë të pastër. Pjesët shpenzuese të tenxheres ekspres është e domosdoshme rregullisht të zëvendësohen.
Mos përdorni tenxheren ekspres pa lëngje, sepse (për shkak të tejnxehjes) do të dëmtohen elementet e sigurisë dhe të mbylljes, si edhe fundi akuterm i enës.
Mos e hapni tenxheren ekspres me dhunë apo para se të jetë plotësisht e sigurt që presioni i brendshëm ka rënë tërësisht (që i gjithë avulli ka dalë nëpërmjet ventilit).
Mos i prekni sipërfaqet e metalta të enës por përdorni doreza. Nëse është e nevojshme përdorni doreza mbrojtëse.
Para se ta lidhni me burimin e nxehjes sigurohuni a është kapaku i mbyllur mirë.
Kur tenxherja ekspres është nën presion, lëvizeni me kujdes. Para hapjes së tenxheres patjetër hiqeni nga priza.
