Të gjithë pacientët që i nënshtrohen procedurave që kërkojnë anestezi, duhet të pyeten për përdorimin e kanabisit, sipas udhëzimeve të lëshuara nga Shoqata Amerikane e Anestezisë Rajonale dhe Mjekësisë së Dhimbjes (ASRA Pain Medicine), shkruan Healthnews.
ASRA thotë se përdorimi i rregullt i kanabisit mund të përkeqësojë dhimbjen dhe të përzierat pas operacionit dhe të rrisë nevojën për opioidë.
Sipas udhëzimeve, anesteziologët duhet t’i pyesin pacientët për llojin e produktit të kanabisit, mënyrën e përdorimit të tij, sasinë e produktit, sa është përdorur kohët e fundit dhe shpeshtësinë e përdorimit të kanabisit.
Anesteziologët duhet të jenë të përgatitur të ndryshojnë planin e anestezisë ose të vonojnë procedurën në rastin e përdorimit të kanabisit.
“Edhe pse disa njerëz përdorin kanabis në mënyrë terapeutike për të ndihmuar në lehtësimin e dhimbjes, studimet kanë treguar që përdoruesit e rregullt mund të kenë më shumë dhimbje dhe vjellje pas operacionit, jo më pak, dhe mund të kenë nevojë për më shumë ilaçe, duke përfshirë opioidet, për të menaxhuar shqetësimin. Shpresojmë që udhëzimet do të shërbejnë si udhërrëfyes për të ndihmuar në kujdesin më të mirë për pacientët që përdorin kanabis dhe kanë nevojë për kirurgji,” tha Samer Narouze, MD, PhD, autor dhe president i ASRA Pain Medicine.
Udhëzimet adresojnë përdorimin në rritje të kanabisit dhe shqetësimin se ai potencialisht mund të ndërveprojë me anestezinë dhe të çojë në komplikime.
Një studim nga paneli Monitoring the Future zbuloi se përdorimi i marihuanës te të rriturit e rinj arriti një nivel të lartë historik në vitin 2021. Në anketë, 43% e të anketuarve të moshës 19 deri në 30 vjeç raportuan përdorimin e marihuanës vitin e kaluar, krahasuar me 34% në 2016.
