Në epokën e komunikimit të menjëhershëm, një vonesë e vogël në përgjigje ose një mesazh i heshtur është shpesh i mjaftueshëm për të shkaktuar panik.
“Ai po më injoron”, “Diçka po ndodh”, “Po më lë” – këto janë mendime të zakonshme që shumë njerëz përjetojnë. Por sipas një artikulli të publikuar nga Psychology Today, ky fenomen nuk është thjesht shqetësim i momentit, por pjesë e një tendence në rritje të quajtur katastrofizim.
Profesoresha Nuala Walsh nga Trinity College Dublin shpjegon se katastrofizimi është një shtrembërim njohës, që na bën të mendojmë për skenarin më të keq të mundshëm edhe në situatat më të vogla. Dhe ky fenomen po përhapet gjithnjë e më shumë në shoqërinë moderne.
Mediet sociale, lajmet dhe stresi i përditshëm kontribuojnë në këtë prirje, duke forcuar ndjenjën e pasigurisë dhe duke deformuar gjykimin racional. Një mesazh i vonuar përkthehet në refuzim. Një vështrim i ftohtë kthehet në fundin e një lidhjeje. Një notë e ulët shihet si dështim jetësor.
Ky lloj mendimi ka pasoja të mëdha: dëmton marrëdhëniet, ul vetëvlerësimin dhe rrit nivelet e stresit. Por, sipas ekspertëve, ekzistojnë strategji të thjeshta për të thyer spiralen:
Vendosja e distancës kohore ndaj ngjarjeve (“A do të ketë rëndësi kjo pas 5 vitesh?”)
Riformulimi i mendimeve (“Nuk është fundi i botës, është një sfidë që do ta kaloj”)
Përqendrimi tek faktet, jo te supozimet
Përdorimi i terapisë njohëse të sjelljes
Kufizimi i kohës së shqetësimit
Vetëvëzhgimi i ndikimit që mendimet tona kanë tek të tjerët
Mesazhi është i qartë: në një botë të zhurmshme nga pasiguritë dhe frikërat, realizmi dhe ndërgjegjësimi janë çelësat e shëndetit mendor dhe të marrëdhënieve të shëndetshme. Herën tjetër që mendja jote të “kërcen” drejt një përfundimi dramatik, ndalu. Reflekto. Dhe pyet veten: “A është kjo realiteti, apo një histori që po më tregon frika?”
