Partia OBRM-PDUKM ka paralajmëruar një politikë tatimore të re që synon të sjellë ndryshime ekonomike në Maqedoninë e Veriut, por ekspertët vlerësojnë se programi mbetet më shumë në nivelin e qëllimeve strategjike sesa në atë të masave të qarta dhe konkrete. Borçe Smilevski, ekspert në fushën e politikës tatimore, në një intervistë për “Local” theksoi se ndryshime të dukshme në taksa direkte mungojnë dhe politika aktuale e një takse të sheshtë do të vazhdojë të aplikohet.
Një nga masat që ka tërhequr vëmendje është përjashtimi nga taksat për kompanitë që marrin punonjës nga administrata publike, masë kjo që synon të adresojë çështjen e mbipunësimit në sektorin publik. Megjithatë, kjo masë, sipas Smilevskit, ka një efekt kryesisht simbolik dhe nuk pritet të japë ndryshime të thella.
Planifikimi për ngritjen e pragut të regjistrimit të TVSH-së nga dy në tre milionë denarë është një tjetër pikë e programit, e cila po ashtu ka ngjallur diskutime. Smilevski thekson se kjo masë nuk synon të përmirësojë në mënyrë substanciale sistemin e TVSH-së, por mund të konsiderohet më shumë si një lehtësim për bizneset e vogla.
Në fushën e dixhitalizimit, parashikimet për përfshirjen e plotë të faturave elektronike dhe përmirësimin e komunikimit ndërmjet tatimpaguesve dhe administratës tatimore janë pritur pozitivisht, duke qenë një hap i rëndësishëm për të lehtësuar marrëdhëniet fiskale dhe për të përshpejtuar proceset.
Sidoqoftë, programi i OBRM-PDUKM-së mbetet për t’u detajuar në zbatimin e tij dhe si do të përballet me sfidat ekzistuese dhe ato të ardhshme në ekonominë e Maqedonisë së Veriut. Diskutimi i gjerë dhe gjithëpërfshirja që partia ka premtuar përpara zbatimit të masave shihet si një element pozitiv, por mbetet të shihet se si këto plane do të konkretizohen në terren.
