Rusët do të kenë mundësinë të blejnë Apple iPhone 14 të ri, pavarësisht se kompania e teknologjisë amerikane është larguar nga vendi falë skemës së importit paralel të Moskës, tha një zyrtar i lartë qeveritar për agjencinë e lajmeve RIA Novosti të enjten.
Siç raporton Reuters, Rusia e njoftoi skemën në mars kur autorizoi shitësit të importonin produkte nga jashtë pa lejen e pronarit të markës tregtare.
I pyetur nëse iPhone i ri, i prezantuar nga Apple të mërkurën, do të importohet sipas skemës, ministri i Tregtisë dhe Industrisë, Denis Manturov tha: “Pse jo? Nëse konsumatorët duan të blejnë këta telefona, po. Do të ekzistojë mundësia”.
Apple ndaloi shitjet e produkteve të reja në Rusi në mars, një javë pasi Rusia nisi pushtimin e Ukrainës, megjithëse iPhone, MacBook dhe mallra të tjera të Apple kanë mbetur të disponueshme në dyqanet ruse pasi shitësit me pakicë shesin stokun e tyre të mbetur të modeleve të vjetra dhe marrin pajisjet e sapo lansuara përmes skemës së importit.
Rrjeti rus celular MTS të enjten në mëngjes tashmë po shiste modelet e reja të iPhone 14 me para-porosi. Çmimet fillojnë nga 84,990 rubla (1,398 dollarë) për versionin 128 GB.
MTS tha se dorëzimi mund të zgjasë deri në 120 ditë dhe ruan të drejtën për të anuluar porositë nëse përballet me vështirësi në importimin e produkteve.
Apple nuk iu përgjigj menjëherë një kërkese për koment.
