Motorola ka prezantuar zyrtarisht tre smartphone nga seria G.
Edhe pse pamja e tyre është pothuajse identike, pajisjet dallojnë në mënyrë të lehtë përsa i përket specifikave teknike.
Moto G86 dhe G86 Power
Moto G86 dhe G86 Power ndajnë të njëjtin harduer bazë, me përjashtim të baterisë. Modeli Power është i pajisur me një bateri me kapacitet prej 6,720 mAh, e cila është më e madhja që është integruar ndonjëherë në një smartphone të Motorola-s. Moto G56, nga ana tjetër, është një model më i përballueshëm me specifika më modeste dhe çmim më të ulët.
Të dy modelet G86 përdorin një ekran OLED 6.67 inç me rezolucion FHD+ dhe frekuencë rifreskimi adaptuese prej 120 Hz. Ndriçimi maksimal lokal i panelit arrin deri në 4,500 nits, ndërsa është i mbrojtur me xham Gorilla Glass 7i dhe ka një sensor të integruar për gjurmët e gishtërinjve.
Të dy telefonët funksionojnë me procesorin MediaTek Dimensity 7300, të kombinuar me 8 GB RAM dhe 256 ose 512 GB memorie të brendshme.
Në pjesën e pasme ndodhet një kamerë kryesore 50 MP (sensor LYT-600), së bashku me një kamerë ultra të gjerë 8 MP që shërben edhe si kamerë makro. Në pjesën e përparme është e vendosur një kamerë selfie 32 MP.
Në ndryshim nga dy modelet e sipërpërmendura të serisë G, Moto G56 vjen me një ekran LCD 6.72 inç FHD+ dhe frekuencë rifreskimi 120 Hz.
Ai është i pajisur me procesorin e ri të MediaTek, Dimensity 7060, i cili ende nuk është prezantuar zyrtarisht. Ky procesor ka CPU me tetë bërthama që punon në 2.6 GHz dhe GPU Imagination IMG BXM-8-256. Pajisja vjen me 8 GB RAM dhe 256 GB memorie të brendshme.
Edhe ky model ka një kamerë kryesore prej 50 MP dhe një kamerë ultra të gjerë prej 8 MP. Bateria ka kapacitet 5,200 mAh me karikim të shpejtë 30W, si dhe certifikime IP68/IP69 për rezistencë ndaj kushteve të vështira.
Ngjyrat në të cilat ofrohet janë Pantone Black Oyster, Pantone Dazzling Blue, Pantone Gray Mist, dhe Pantone Dill. Çmimi i tij arrin deri në 250 euro.
