Ishte një test i thjeshtë i ADN-së në shtëpi, një dhuratë për Krishtlindje, që ndryshoi jetën e dy kanadezëve përgjithmonë.
Richard Beauvais, nga qyteti bregdetar Sichelt në Kolumbinë Britanike, u rrit duke besuar se ishte vendas gjatë gjithë jetës së tij, por testi që ai bëri tregoi se ai ka një përzierje gjaku ukrainas, hebre dhe polak, raporton BBC.
Në të njëjtën kohë dhe pothuajse 2.400 kilometra larg, motra e Eddy Ambrose nga Winnipeg Manitoba, e cila u rrit nga një familje ukrainase, bëri gjithashtu një test të ADN-së dhe zbuloi se ajo nuk kishte lidhje me Eddy. Në fakt, Richard Beauvais ishte vëllai i saj biologjik.
Kjo çoi në një zbulim që ndryshon jetën: që Richard Beauvais dhe Eddy Ambrose lindën në të njëjtën ditë në të njëjtin spital në qytetin e vogël të Arborg, Manitoba në 1955, por u ndërruan në lindje. Këtë javë, gati 70 vjet më vonë, Beauvis dhe Ambrose morën një falje formale personale nga kryeministri i Manitoba Wab Kinew, për traumën që pësuan si rezultat i shkëmbimit.
“Dua të kërkoj një falje të vonuar për veprimet që kanë lënduar dy fëmijë, dy grupe prindërish dhe dy familje gjatë shumë brezave. Ndonjëherë na kërkohet të kuptojmë ndjeshmërinë dhe dhembshurinë duke parë se si është të ecësh në këpucët e dikujt tjetër”, tha kryeministri.
Në vitet e tyre të hershme, Beauvais dhe Ambrose bënin jetë krejt të ndryshme, tha avokati i tyre Bill Gange për BBC.
Beauvais, 68 vjeç, u rrit nga njerëzit indigjenë Metis në Kanada, të cilët kanë përzier rrënjë aborigjene dhe evropiane. Babai i tij vdiq kur ai ishte tre vjeç, duke e lënë atë përgjegjës për motrat e tij më të vogla, ndërsa nëna e tij luftoi me humbjen.
Ai ndoqi një shkollë ditore për fëmijët aborigjenë dhe më vonë u mor me forcë nga familja e tij në vitet 1960, si pjesë e politikës së asimilimit të Kanadasë, ku fëmijët aborigjenë ose vendoseshin në shtëpi ose birësoheshin jashtë komuniteteve të tyre.
Në të njëjtën kohë, Ambrose u rrit në një fermë në Manitoba rurale me prindër ukrainas që e donin dhe kujdeseshin shumë për të, tha avokati Gange, ku ai dëgjonte këngë popullore ukrainase para gjumit. Më vonë ai u dha edhe për birësim, pasi mbeti jetim në moshën 12-vjeçare.
Gjatë gjithë jetës së tij, Ambrose nuk e mendoi kurrë veten si me prejardhje vendase. Për vite me radhë, Bove ishte krenar që kishte të vetmen varkë të peshkimit vendas në bregun e Kolumbisë Britanike. "Tani ai e kuptoi se të gjithë ishin vendas përveç tij," thotë avokati Gange.
Si fëmijë, Ambrose i kërkoi një vajze që jetonte disa qytete larg të ishte në ekipin e tij të bejsbollit gjatë pushimeve, shtoi kryeministri, "duke mos e ditur se ajo ishte në të vërtetë motra e tij biologjike".
Dhe kur ishte adoleshent, dashuria e Beauvais për peshkimin e solli në të njëjtin breg me motrën e tij biologjike, e cila po peshkonte pranë tij dhe ata nuk e dinin se kishin lidhje.
Pavarësisht humbjeve, Gange tha se të dy janë shumë krenarë për atë që janë bërë dhe për familjet që i kanë rritur. Dhe tani ata kanë fituar familje të reja.
Ambrose kontaktoi me të afërm biologjikë dhe u bë anëtar i Federatës Manitoba Metis.
Beauvais gjithashtu ka në plan të lidhet me familjen e tij biologjike dhe që kur u zbulua, dy vajzat e tij të rritura kanë bërë tatuazh "Ambrose" në krahët e tyre, për nder të mbiemrit të supozuar të babait të tyre.
Të dy burrat, përmes përfaqësuesit të tyre ligjor, kërkuan falje dhe kompensim financiar nga provinca e Manitoba. Avokati Gange tha se fillimisht provinca nuk ka komentuar çfarë ka ndodhur me ta, duke pretenduar se spitali ku ka ndodhur gabimi menaxhohej nga bashkia dhe nuk ishte përgjegjësi e provincës.
Kërkimi i faljes është një pranim domethënës se "ndodhi një gabim, që i preku të gjithë", thotë Gange, duke iu referuar Beauvais, Ambrose dhe familjeve të tyre.
Megjithatë, nuk ka asnjë fjalë nëse ai do të marrë kompensim financiar, megjithëse avokati Gange tha se do të vazhdojë ta ndjekë atë.
Avokati nga Winnipeg ka fituar me sukses kompensimin në raste të tjera të kanadezëve të zhvendosur në të kaluarën, por në ato raste ata kanë lindur në spitale federale.
Beauvais dhe Ambrose janë rastet e treta të njohura të ndërrimit të foshnjave në lindje në Manitoba. Gange tha se është e vështirë të dihet se sa shpesh ndodhin këto raste. Ai deklaroi se Beauvais dhe Ambrose zbuluan se ata u ndërruan vetëm përmes një rastësie me fat - një test në shtëpi të ADN-së.
“Ky është vetëm supozimi im, por besoj se ndërsa këto teste të ADN-së në shtëpi bëhen të përhapura, do të zbulohen më shumë raste të tilla”, përfundoi Gange.
