Mashtrimi kinez, po na përgjon me urdhër nga Serbia / Ministria e Brendshme heshtë!

Kosova po rrezikon të përgjohet falë disa pajisjeve kineze të gjurmimit të vendosura në shumë vende, nëpërmjet Serbisë. Beogradi fshehtas po financon përpjekjet për të instaluar kamera mbikëqyrëse dhe të jashtëligjshme kineze në Kosovë.

Madje thuhet se kjo është bërë në një mënyrë të fshehtë përmes një tjetër projekti që kishte gëzuar fortë qytetarët e Kosovës. Kështu, në gusht të vitit 2020 monitorët e parë digjitalë u vendosën në stacionet e autobusëve të Prishtinës, por aty nuk shfaqej orari i transportit urban.

Kompania kineze, që kishte prodhuar këto monitorë, kishte vendosur të reklamojë veten derisa të instalohej itinerari i autobusëve apo të vijnë reklamat vendase. Në këto ekrane të mëdha me sfond të zi shfaqej vetëm brendi MIPS dhe disa shkronja në gjuhën kineze. Nuk është çështja thjesht se ata janë monitor kinez.

Këta monitorë kanë të instaluara edhe kamera. Në faqen ku jepet përshkrimi i këtij lloji të aparatit, ndër specifikimet mund të hetohet fakti se kjo kamerë kineze nga MIPS-i ka aftësinë të zbulojë dhe të njohë fytyrat.

Shërbimi ballkanik i Radios Evropa e Lirë (REL) ditë më parë raportoi se edhe Kosova rrezikohet nga teknologjia kineze e survejimit, e cila po instalohet me financim nga Beogradi në disa rajone jashtë kontrollit të Qeverisë së Kosovës. Sipas REL-it, një autoritet i përkohshëm me shumicë serbe në Kosovën juglindore ka nënshkruar një marrëveshje muajin e kaluar për blerjen e kamerave të vogla të vëzhgimit, të regjistruesve digjitalë dhe të pajisjeve të tjera në vlerë prej dhjetëra mijëra eurosh nga kompania Zhejiang Dahua Technologies.

Kjo kompani gjendet në listën e zezë të SHBA-së për shkak të monitorimeve jolegale.

Ministria e Punëve të Brendshme po hesht, përgjimet po vazhdojnë

Për një rrezik të tillë që i kanoset Kosovës, gazeta ‘Bota sot’ ka kontaktuar Ministrinë e Punëve të Brendshme, mirëpo ata nuk e kanë komentuar fare këtë çështje.

Megjithatë, ish zëvendësministri i MPB-së dhe eksperti i sigurisë, Hajrullah Tërnava në një prononcim thotë se në rrethana në të cilat tani gjendet Kosova si shtet i ri dhe në ndërtim e sipër me institucionet e saj, duhet të ecë në hap me kohën, dhe t’iu jepet rëndësi kuadrove të shkolluara ashtu si duhet, e sidomos kuadrove profesionale që punojnë në punë të ngjashme me teknikat e përgjimit të përsosura tani që e kanë përfshi botën.

Hajrullah Tërnava

“Këtyre kuadrove që e kanë si profesion t’i përcjellin të arriturat teknike qoftë të përgjimeve e që këto kuadro kryejnë edhe shkollime speciale si në shtetin tonë, ashtu edhe jashtë në shtetet mike tjera që na qëndrojnë pranë. Këto kuadro i përkasin shërbimeve speciale sikur që janë shërbimet sekrete e që punojnë në mënyrë permanente në mbrojtjen e shtetit, e sidomos shteteve që janë armiqësisht të orientuara ndaj shtetit tonë, e që po ato shtete bëjnë ҫ’mos t’i arrijnë qëllimet e tyre dhe të depërtojnë në thellësitë e institucioneve të shtetit tonë, prandaj ato shtete investojnë edhe në bashkëpunëtorë t’i paguajnë mirë, e që e kanë për detyrë që të kontribuojnë dhe t’iu kryejnë detyrat e atyre shteteve nga të cilat janë të paguar t’ua mbajnë sekretin e tyre, dhe e kanë për detyrë që në asnjë mënyrë të mos dekonspirohen-zbulohen, të gjithë ata bashkëpunëtorë janë të përbetuar që deri në vdekje të punojnë për atë shtet, i cili edhe investon shumë në ta”, thekson Tërnava.

Ai thotë më tutje se, në të arriturat shkencore tani nëse kemi kuadro të tilla të atyre profileve dhe niveleve të shkolluara dhe që punojnë në shërbimet e shtetit tonë, këto kuadro nuk e kanë aq të vështirë që t’i zbulojnë ato pajisje përgjuese dhe t’i bllokojnë ato, sepse edhe gjatë punës së tyre ballafaqohen me këto çështje, dhe vetvetiu e kanë për detyrë që t’i zbulojnë këto përgjime e për të cilat punë edhe paguhen nga shteti.

“Prandaj, në këtë pikëpamje shtetet mike që kanë tradita më të gjata dhe më efektive në bazë të përvojave të tyre dhe teknikave që i posedojnë, e që po edhe ato shtete njëjtë i kanë bashkëpunëtorët e tyre në po ato shtete që kanë interesa për to, dhe që i kanë nënkontrollë dhe duan të jenë në rrjedha të ndodhive botërore dhe t’i zbulojnë të gjitha edhe ato fshehtësi të atyre shteteve që janë armiqësisht të orientuara ndaj tyre, sepse kur ai shtet t’i zbuloj ato fshehtësi, tani më ai shtet nuk llogaritet si i rrezikshëm, sepse shteti që i ka zbuluar e ky është kundërzbulimi, tani i ndërton mënyrat teknike dhe taktike të këtij lloji sekret të zhvillimeve, dhe të ndikimeve edhe të shtetet tjera që kanë qëllime të tilla ndaj atyre shteteve”, thekson ai.

Tërnava: Nuk është ndonjë befasi kur dihen qëllimet e saj shekullore

Tutje ish zv/ministri i MPB-së, thotë se tentimi i Serbisë që të zhvilloi aktivitete të tilla sekrete përmes shërbimit të saj BIA me teknika të përgjimit, nuk është ndonjë befasi kur dihen qëllimet e saj shekullore.

“Nëse një shtet i huaj arrin t’i montoj teknikat e përgjimit në ato vende ku është e interesuar, atëherë ai shtet e ka të lehtë t’i arrij qëllimet e saj politike informuese si apo dezinformuese, për qëllimet e saj në politikat që i zhvillon në atë shtet, dhe të zhvilloj dezinformime që lidhen me atë shtet dhe shtetet tjera që është e interesuar t’i kyq në acarimin e marrëdhënieve shtetërore edhe me tjerat shtete, që i shkojnë për shtati shtetit në fjalë e që është armiqësisht e orientuar ndaj shtetit tonë. Prandaj shteti duhet t’iu kushtoi rëndësi të posaҫme atyre që punojnë në ato shërbime sekrete, që i takojnë shtetit tonë, dhe kuadrat e saj t’i shkolloj në ҫdo aspekt dhe t’i pajisë me teknikat më të avancuara, dhe me benifite dhe paga të mira e sidomos kuadrove udhëheqëse t’ju kushtojë rëndësi të posaҫme në ҫdo aspekt”, vlerëson eksperti Tërnava.

Mulliqi: Kështu e realizoi Serbia këtë skenar duke shfrytëzuar minoritetin serb

Ndërkaq, analisti politik, Skënder Mulliqi thotë se Serbia krahas kërcënimeve me luftë, ka futur në funksion tërë arsenalin propagandistik kundër Kosovës dhe të ardhmes të saj.

Skënder Mulliqi

“Ajo përmes institucioneve të pashuara paralele dhe shërbimeve të tyre sekrete kriminale, ka tentuar që krejt pas luftës, jo vetëm në veri të vendit, por edhe në enklava të krijojë destabilitet politik të shoqëruar edhe me akte të dhunës. Veriu i Kosovës kurrë nuk është kontrolluar sa duhet nga organet tona të shtetit. Është bërë qendra nga po koordinohen të gjitha aksionet antiKosovë. Kohën e fundit ҫetniku Vuҫiq, ka vu në disponim të gjithë arsenalin propagandistik, për të bërë faktike ndarjen e Kosovës mbi baza etnike. Për të realizuar këtë skenar të kamotshëm Serbia me institucionet paralele dhe duke e shfrytëzuar minoritetin serb, ka ble sistemin video-mbikëqyrë të tipit kinez që është nën sanksionet e SHBA-ve, dedikuar shkollave në 12 komunat e Kosovës. Dokumentacioni i këtyre video-mbikëqyrjeve të markës kineze Dahua, të cilat Serbia i ka marrë nga Kina, kanë për qëllim identifikimin e fytyrave”, vlerëson Mulliqi.

“Këto mjete përgjuese sigurisht se kanë edhe qëllime të tjera, që Serbia të krijojë terren të përshtatshëm për subversione edhe të karakterit luftënxitës. Organet tona të rendit dhe ligjit, duhet të jenë më vigjilente, më shumë se kurrë më parë, duke vepruar dhe duke rritur kontrollin lidhur me pajisjet, e instaluara në territorin e Kosovës. Dihet se në këto punë kundër Kosovës dhe pavarësisë së saj është duke marrë pjesë edhe Rusia, e cila me Serbinë janë duke e kërcënuar rajonin dhe Kosovën me një luftë të re. Duhet të pengohet interceptimi i Serbisë brenda Kosovës. Të ndalohet çdo veprimtari e këtyre agjenturave dhe strukturave kriminale të instaluara në Kosovë, edhe nëpërmjet rrjeteve elektronike të spiunimit. Ka ardhur koha që të marrin fund diversionet e ndryshme të këtyre shërbimeve dhe pushtetit fashist të Beogradit në Kosovë”, thekson ai.

Mulliqi duke përmendur rastin e Gjilanit, thotë se dihet edhe veprimi i strukturave paralele, për vendosjen e video përgjimeve në Ranillug, komunë me shumicë serbe.

“Edhe sipas Departamentit të Tregtisë së SHBA-së, Dahua Technology është kompani kineze, e cila që nga viti 2019, gjendet në listën e zezë të SHBA-së për shkak të ndërlidhjes së saj me shkeljet e të drejtave të njeriut dhe fushatën kineze të represionit ndaj ujgurëve në provincën kineze Xinjiang. Kjo na i hapë të gjitha rrugët ligjore për veprim, për të mos lejuar pos tjerash edhe cenimin e të drejtave të njeriut edhe në Kosovë”, thotë Mulliqi.