Zyrtarë nga Gjermania, kanë reaguar ndaj emisarit amerikan për dialogun Kosovë-Serbi, Gabriel Escobar, i cili ka thënë se përveç vendimit për pronat e Manastirit të Deçanit (të cilin Qeveria e Kosovës e miratoi), për anëtarësimin e Kosovës në Këshillin e Evropës duhen edhe dy kushte (shpronësimet në veri të Kosovës dhe krijimi i Asociacionit. të komunave me shumicë serbe). Këtë e kundërshtojnë zyrtarë nga Gjermania, të cilët thonë se nuk është e drejtë të ketë kushte shtesë për Kosovën.
Kryetari i Komitetit për Punë të Jashtme në Bundestagun gjerman, Michael Roth, e ka kritikuar SHBA-në se po i vendos kritere të reja Kosovës për t’u anëtarësuar në Këshillin e Evropës.
Roth ka thënë se kjo qasje e pabalancuar ndaj Kosovës duhet të përfundojë.
“Është krejtësisht e pakuptueshme që SHBA vendos ekstra kushte për anëtarësimin e Kosovës në Këshillin e Evropës. Kjo qasje e pabalancuar nga SHBA-ja drejt Kosovës duhet përfundimisht të përfundojë. S’është fer dhe është e padrejtë. Këshilli i Evropës dhe shtetet anëtare ulen në ulësen e shoferit – jo SHBA”, ka shkruar Roth në X, teksa rishpërndau një postim të kolegut të tij të Bundestagut, Frank Schëabe.
Duke komentuar këto reagime, profesori për Studime Evropiane në Universitetin Johns Hopkins në SHBA, David Kanin, ka thënë se Shtetet e Bashkuara të Amerikës dhe Bashkimi Evropian, po ndryshojnë taktikën dhe jo strategjinë për Kosovën dhe Serbinë. Ai ka theksuar për gazetën “Bota sot”, se Perëndimi po vendos kushte zbatimin e zotimeve, për të marrë rezultate.
“Kërkesat e SHBA-së dhe BE-së për Kosovën dhe Serbinë përbëjnë një ndryshim të taktikave dhe jo të strategjisë. Pasi nuk arriti t'i mposht këta antagonistë në zbatimin e marrëveshjes së detyruar në Ohër vitin e kaluar, Perëndimi tani po e vendos zbatimin si kusht për rezultatet që dëshiron secili. Kërkesa të cilës Prishtina i nënshtrohet ndalimit të dinarit dhe veprimeve të tjera në veri, konceptualisht shoqërohet me vendimin e BE-së për të shtuar angazhimet e Beogradit në Ohër në kapitullin 35 të procesit zyrtar të anëtarësimit të Serbisë në BE”, ka deklaruar Kanin.
Sipas ekspertit amerikan, kryeministri Albin Kurti, megjithëse “lëshoi pe” për Manastirin e Deçanit, një gjë të tillë nuk ka shenja se do ta bëjë me Asociacionin.
“Aleksandar Vuçiq duket jo i impresionuar teksa i drejtohet ish-presidentit (dhe të ardhshëm?) të SHBA-së, Donald Trump (nëpërmjet Jared Kushner dhe Richard Grenell). Në anën tjetër, nuk është sekret se Albin Kurti ka vonuar sa më gjatë para se të lëshojë pe për çështjen e manastirit të Deçanit dhe deri më tani nuk ka shenja se është i gatshëm të krijojë një Asociacion të Komunave Serbe, të cilin me të drejtë e sheh si kërcënim për sovranitetin tashmë të ngecur të Kosovës”, ka thënë më tej David Kanin për “Bota sot”.
Ai ka treguar se qëllimi i perëndimorëve, është të nxjerrin një “sukses” në Ballkan.
“Nëse është "e drejtë" të bëhen kërkesa të tilla ndaj Kosovës varet nga këndvështrimi i dikujt, por është e qartë se diplomatët perëndimorë edhe një herë po përpiqen të bëjnë një "sukses" në Ballkan, ndërsa qeveritë e tyre luftojnë me politikat e lëkundura të sigurisë në pjesë të tjera të botës”, ka nënvizuar profesori.
Ai ka komentuar edhe deklaratat e zyrtarëve gjermanë, teksa ka shtuar se në rast se Donald Trump kthehet në Shtëpinë e Bardhë, Vuçiq, do të luajë me Kinën në njërën anë dhe SHBA-në, në anën tjetër.
“Komentet e zyrtarëve gjermanë pasqyrojnë vetëm një nga shumë zërat kontradiktore evropiane në lidhje me çështjet e Ballkanit. Më dukej më interesant fakti që udhëheqësit bavarez thanë se po kërkojnë nga Kina si dhe nga SHBA-ja për të ndihmuar në gjetjen e një zgjidhjeje në Ukrainë. Ndërsa politikat amerikane lëkunden dhe politika dhe shoqëria amerikane copëtohen, Pekini përfiton në heshtje. Vuçiq ka kultivuar marrëdhënie të mira me Kinën prej vitesh dhe nëse Trump kthehet në Shtëpinë e Bardhë, Beogradi mund të jetë i pozicionuar mirë për të luajtur të dyja anët e ndarjes së superfuqive”, ka shtuar David Kanin.
