Kosova e humbi mundësinë historike për anëtarësim në Këshillin e Evropës më 17 maj, megjithëse Asambleja Parlamentare rekomandoi anëtarësimin e saj.
Duke komentuar këtë zhvillim, bashkëpunëtori i Këshillit për Politikat e Demokratizimit në Bruksel, Toby Vogel, ka thënë për gazetën “Bota sot” se anëtarësimi u “rrëmbye” nga shtetet e fuqishme anëtare, Gjermania, Franca dhe Italia.
Sipas tij, këto shtete në njërën anë dhe kryeministri i Kosovës Albin Kurti, i bënë llogaritë gabim. Pala e parë, siç ka thënë Toby, mendoi se Kosova do të dorëzohej për Asociacionin, derisa Kurti mendoi se vota në Asamblenë e KiE nuk do të anashkalohej nga Komiteti i Ministrave.
“Procesi i anëtarësimit të Kosovës në Këshillin e Evropës u rrëmbye nga Gjermania, Franca dhe Italia për të nxitur lëvizjen në Asociacion. Kosova i plotësoi të gjitha kushtet e përcaktuara në raportin e Bakojanis, i cili u miratua me një shumicë dërrmuese prej më shumë se 80% të deputetëve të pranishëm. Nuk kam një pasqyrë të veçantë në të menduarit e kryeministrit Kurti, por duket se ai mendoi se kjo do ta mbrojë Kosovën nga kushtet shtesë politike, të palidhura me Këshillin e Evropës, të imponuara nga Gjermania, Franca dhe Italia. Të dyja palët e tepruan dhe llogaritën gabim: Kurti mendoi se shumica dërrmuese në APKE nuk do të injorohej nga Komiteti i Ministrave, ndërsa Gjermania, Franca dhe Italia mendonin se Kosova tani ishte aq afër anëtarësimit sa thjesht do të dorëzohej në Asociacion. Doli se të dyja palët kishin gabuar në analizën e tyre dhe tani procesi ka ngecur”, ka deklaruar eksperti për “Bota sot”.
Qeveria e Kosovës, njoftoi se është duke përgatitur draft-statutin për Asociacionin e komunave me shumicë serbe, për t'ia dorëzuar Gjykatës Kushtetuese për shqyrtim. I pyetur nëse ky draft do të bindë Gjermaninë, Francën dhe Italinë, Vogel ka theksuar se ato kanë kërkuar vetëm hapa konkretë drejt krijimit të Asociacionit.
Ai treguar arsyen se pse Bashkimi Evropian, ndërhyri dhe paraqiti draftin e vet për Asociacionin.
“Berlini, Parisi dhe Roma nuk kishin kërkuar asnjëherë krijimin aktual të Asociacionit si parakusht, por hapa kuptimplotë drejt krijimit të saj, si p.sh. një projekt-statut që do të dorëzohej në Gjykatën Kushtetuese. Unë thjesht nuk e kuptoj – nëse versioni i qeverisë për draftin e FES-it është mjaft i mirë për qeverinë sot, atëherë pse nuk ishte mjaft i mirë më shumë se një vit më parë, kur u prezantua për herë të parë? Kujtojmë se arsyeja pse BE-ja paraqiti draftin e saj ishte se qeveria Kurti thjesht u ul në versionin e FES. Kjo është arsyeja pse BE-ja mendoi se duhej të ndërhynte dhe të paraqiste draftin e vet. Është e pakuptueshme që Kurti të kthehet në një version të mëparshëm; është teatri politik ai që ushqen ndjenjën në anën e QUINT-it se ai nuk është serioz”, është shprehur më tej Toby Vogel.
Sipas ekspertit, dialogu mes Kosovës dhe Serbisë ka vdekur qe një vit, që nga Marrëveshja e Ohrit.
Ai ka fajësuar ndërkombëtarët se përderisa Kosovën e ndëshkojnë për shkelje shumë të vogla, Serbia nuk është përballur ende me ndonjë pasojë për refuzim të dialogut.
“Le ta pranojmë: dialogu ka dështuar dhe ka vdekur për më shumë se një vit, që nga “marrëveshja” e dështuar e Brukselit/Ohrit që u refuzua nga Serbia. Serbia e ka bërë të qartë – në mënyrë eksplicite dhe zyrtare – se nuk do të pajtohej me asgjë që nënkupton njohje de facto, që do të thotë se parimi i parë i dialogut nuk pranohet më nga njëra nga të dyja palët. Serbia ende nuk është përballur me ndonjë pasojë për refuzimin e saj, ndërsa Kosova është duke u ndëshkuar për shkelje shumë më të vogla. Për sa kohë që kjo dinamikë bazë vazhdon – me fjalë të tjera, për sa kohë që SHBA dhe BE e përqendrojnë të gjithë strategjinë e tyre për arsyen te Vuçiqi – gjërat nuk do të lëvizin”, ka theksuar Vogel për “Bota sot”.
