Policia ka njoftuar se më 31 janar 2026, rreth orës 16:00, Stacioni Policor i Shkupit ka pranuar një raport për një incident të rëndë që ka ndodhur në fshatin Gllumovë, pranë Shkupit. Sipas informatave të para, një plumb qorr ka plagosur një vajzë 10-vjeçare, e cila ndodhej në oborrin e një shtëpie gjatë momentit të incidentit.
Vajza ka marrë goditje në këmbë dhe gjendja e saj është cilësuar si e rëndë. Menjëherë pas incidentit, ajo është dërguar në Kompleksin Klinik “Nëna Tereza”, ku mjekët kanë konstatuar lëndime të rënda trupore dhe kanë filluar trajtimin e saj urgjent.
Autoritetet shëndetësore po monitorojnë nga afër gjendjen e saj dhe ndodhet nën kujdes të specializuar mjekësor.
Policia ka nisur hetimet për të sqaruar rrethanat e sakta të ngjarjes dhe për të identifikuar burimin e plumbit qorr.
