Mos prisni të shpërthejnë sëmundjet për të vaksinuar fëmijët. Apeli iu shkon prindërve nga mjekët pediatër në javën europiane të ndërgjegjësimit për rëndësinë e imunizimit në parandalimin e sëmundjeve dhe mbrojtjen e jetës.
Kështu ndodhi me fruthin që pas përhapjes së infeksionit shumë prindër nxituan për ti vaksinuar fëmijët e tyre. Niveli i vaksinimit tek moshat 1 dhe 5 vjeç sipas Institutit të Shëndetit Publik u rrit me afro 30%.
Në vendin tonë mjekët thonë se përgjithësisht ka një përthithje të mirë të vaksinave përveç asaj të fruth, rubeolës dhe shytave të cilën shpesh prindërit e lidhin me autizmin dhe e shtynë deri sa fëmija të thotë fjalët e para.
Sipas Organizatës Botërore të Shëndetësisë rajoni mbetet nën ndikimin e paprecedentë të pandemisë dhe tre vitet e fundit më shumë se 1.8 milion fëmijë kanë humbur vaksinimin kundër fruthit pasojë e të cilës ishte rritja e numrit të rasteve me fruth me 60%.
Neglizhenca e vaksinave të kalendarit po e përball botën me rrezikun e rikthimit të disa sëmundjeve.
Në Shqipëri për ta parandaluar institucioneve arsimore iu është kërkuar të mos të lejojnë në kopshte dhe shkolla fëmijë pa certifikatën e vaksinimit.
