Në Tiranë u mbajt dje ceremonia e ndarjes së çmimeve për fituesit e thirrjes së parë “Challenge Fund” të programit EU4Innovation.
Ministrja e Shtetit për Sipërmarrjen dhe Klimën e Biznesit, Delina Ibrahimaj e pranishme në këtë ceremoni siguroi për mbështetje nga ana e qeverisë, ndërsa vlerësoi se Bashkimi Europian mbetet një partner i rëndësishëm për startup-et dhe inovacionin në Shqipëri.
“Gjithmonë frymëzuese të shoh nga afër ide të reja dhe entuziastë të inovacionit, që çojnë përpara ëndrrën e të qenit sipërmarrës në vendin e tyre. Mbështetja nga qeveria nuk do të mungojë. Në Ministrinë e Sipërmarrjes dhe Klimës së Biznesit jemi të angazhuar në ndërtimin e politikave sa më efikase në mbështetje të sipërmarrësve inovatorë, duke çuar përpara edhe strategjinë kombëtare për sipërmarrjen inovatore që prezantuam muajin e shkuar”, tha ajo.
Krijimi i këtij biznesi inovativ ka si qëllim të ofrojë zgjidhje, shpikje apo risi teknologjike për të zgjidhur një problematikë të caktuar që ofron tregu.
Startup-i ka potencial të lartë rritjeje dhe zgjerimi. Ato morën një hov shumë të madh gjatë kohës së COVID-19, ku njerëzve u duheshin zgjidhje të përditshmërisë duke qëndruar në shtëpi. Bizneset përqafuan shpejt shitjet online, menutë u bënë digjitale si dhe pagesat online patën rritje.
