“Dyshja e autokratëve të Shqipërisë dhe Serbisë, Rama dhe Vuçiç, i kanë kanalizuar energjitë në drejtimin e gabuar me aspiratat europiane dhe euro-atlantike të rajonit, në planet e tmerrshme për shkëmbimin e territoreve, në modelet përjashtuese të bashkëpunimit rajonal, si “Ballkani i Hapur”, duke sfiduar nismat e udhëhequra nga Bashkimi Europian si “Procesi i Berlinit””, shprehet Presidenti i Partisë së Lirisë, Ilir Meta.
Në një postim në rrjetet sociale, Meta thekson se ne duhet të përqendrohemi në zbatimin pa vonesë të “Procesit të Berlinit” dhe të mos shpërqendrohemi nga qasjet alternative paralele, jo gjithëpërfshirëse.
Sipas tij, “Procesi i Berlinit” fuqizon procesin e zgjerimit, duke i përshtatur reformat e kërkuara me shpërblimet financiare.
“’Procesi i Berlinit’ përmban 6 vendet e Ballkanit Perëndimor në tryezën politike të Bashkimit Europian dhe përfaqëson vullnetin e vendeve tona.
Çdo proces që copëton BE-në përfaqëson frikën politike të liderëve autokratikë për humbjen e pushtetit të tyre”, shprehet Meta.
