Të tjera detaje janë bërë publike në lidhje me grupin kriminal që shisnin armë zjarr. Në pranga u vunë tre persona, Artur Brahimaj, Ilir Zyberi dhe Artur Rushiti, ndërsa një tjetër u shpall në kërkim.
Bëhet fjalë për një grup kriminal të përfshirë në trafikun e armëve të zjarrit prej disa kohësh.
Nuk kanë lidhje me grupet e tjera të goditur muajt e fundit nga Komisariati nr. 4. Armët e sekuestruara dyshohet se i kanë sjell nga Fieri, ndërsa po në këtë qytet po hetohen persona të tjerë që mund të jenë pjesë e grupit.
Sipas burimeve armët shiteshin rreth 700-800 euro për llogari të grupeve të tjera kriminale dhe dyshohet se do përdoreshin në ngjarje kriminale.
Kush është Ilir Zyberi
Ilir Zyberi 55 vjeç, i njohur edhe me mbiemrin Avdillari është i dënuar më herët për vrasje, si dhe i skeduar në vitin 2017 për drogë.
I njohur si një ndër anëtarët e bandës së Yzberishtit në vitet ’97’98, ka qenë i dyshuar për të paktën 20 vepra të rënda penale.
Dënimin më të rëndë prej 22 vitesh burgim, ai e mori për vrasje, duke e përfunduar disa muaj para se të arrestohej në vitin 2017.
Ai ishte dënuar për vrasjen e biznesmenit italian Stefano Rossi.
Vrasja u krye më 27 janar të vitit 1998, në momentin kur Rossi kishte tërhequr 30 milionë lireta nga banka dhe u ekzekutua vetëm 100 metra larg fabrikës së tij.
