Ekipet e shpëtimit që përpiqen të gjejnë dhjetëra punëtorë ndërtimi të zhdukur që nga shembja e një kompleksi apartamentesh shumëkatëshe në një qytet bregdetar në Afrikën e Jugut, kanë kontaktuar me 11 persona që kanë mbetur të ngujuar nën rrënojat e shkatërruara, thanë autoritetet të martën.
Një burrë thirri gruan e tij nga poshtë rrënojave të ndërtesës pesëkatëshe që ishte në ndërtim e sipër kur ajo u shemb të hënën, tha kreu i operacionit të shpëtimit. Kjo u mundësoi reaguesve të urgjencës të gjenin burrin, megjithëse ai ishte ende i bllokuar dhe ende nuk ishte nxjerrë jashtë.
Gjashtë punëtorë janë konfirmuar të vdekur dhe ekziston frika se numri i të vdekurve mund të rritet ndjeshëm. Nuk ka asnjë lajm për 37 persona të tjerë të pagjetur – mes pllakave të mëdha të skelave prej betoni dhe metali që u rrëzuan kur ndërtesa u shemb në qytetin George, rreth 400 kilometra në lindje të Cape Town.
Njëzetë e një punëtorë të tjerë u shpëtuan nga vendi dhe u dërguan në spitale të ndryshme, me të paktën 11 prej tyre që pësuan lëndime të rënda, tha bashkia e George.
Colin Deiner, kreu i shërbimeve provinciale të menaxhimit të fatkeqësive në Kepin Perëndimor, tha se operacioni i kërkim-shpëtimit ka të ngjarë të zgjasë të paktën tre ditë.
