Të martën në Francë protestuesit bllokuan shinat e trenave dhe autostradat, si dhe u përleshën me policinë në disa qytete, ndërsa marshuan në të gjithë vendin, kundër projektligjit për ngritjen e moshës së pensionit.
Zhgënjimi publik, ka evoluar tashmë në një ndjenjë më të gjerë, anti-Macron.
Më herët gjatë ditës, qeveria hodhi poshtë një kërkesë të re të sindikatave për të pezulluar dhe rishqyrtuar projektligjin, i cili parashikon një rritje të moshës së daljes në pension me dy vjet, nga 62 në 64 vjeç. Ky veprim zemëroi përfaqësuesit e sindikatave që thanë se qeveria duhet të gjejë një rrugëdalje nga kriza.
Qeveria tha se ishte më se e gatshme të fliste me sindikatat, por për tema të tjera, duke përsëritur se do të qëndronte e vendosur në frontin e pensioneve.
"Ne kemi propozuar një rrugëdalje dhe është e patolerueshme që po na injorojnë sërish", u tha gazetarëve kreu i sindikatës ‘CFDT’, Laurent Berger, në fillim të një mitingu në Paris.
Zoti Macron, i cili premtoi të realizojë reformën e pensioneve, në të dyja fushatat e tij presidenciale, thotë se ndryshimi është i nevojshëm për të mbajtur në ekuilibër financat e vendit. Por sindikatat dhe partitë opozitare thonë se ka mënyra të tjera për ta bërë një gjë të tillë.
Miliona njerëz kanë demonstruar e mbajtur greva që nga mesi i muajit janar duke kundërshtuar projektligjin e pensioneve.
Protestat u intensifikuan kryesisht kur qeveria përdori kompetenca të veçanta për ta kaluar projektligjin në parlament pa votim.
Të enjten e kaluar, ditë kur u zhvilluan protesta të mëdha, ata që njihen si anarkistët e "Bllokut të Zi" thyen xhamat e dyqaneve, dëmtuan stacionet e autobusëve dhe plaçkitën një restorant ‘McDonald's’ në Paris. Akte të ngjashme u kryen edhe në qytete të tjera./VOA
