Të paktën tre persona humbën jetën dhe më shumë se një duzinë të tjerë u lënduan nga një zjarr në një shtëpi në Gjermaninë perëndimore, thanë autoritetet të hënën.
Zjarri shpërtheu në orët e para të ditës në katin e parë të një shtëpie katërkatëshe në Solingen dhe shpejt doli jashtë kontrollit, tha një zëdhënës i departamentit të zjarrfikësve për transmetuesin publik WDR.
Të paktën 16 persona u shpëtuan, nëntë prej të cilëve u dërguan në spital, duke përfshirë dy në gjendje të rëndë, sipas zëdhënësit. Disa të tjerë u trajtuan në vend për thithje tymi dhe lëndime të lehta.
Mediat lokale raportuan se shkallët prej druri të ndërtesës së vjetër shpërthyen shpejt në flakë gjatë zjarrit, njerëzit në katet e sipërme u bllokuan dhe disa prej tyre u përpoqën të hidheshin nga dritaret për të shpëtuar jetën e tyre.
Shkaku i zjarrit nuk ishte menjëherë i qartë. Policia tha se një hetim është duke u zhvilluar në bashkëpunim me autoritetet e tjera shtetërore./AA/
