Ashtu si çdo vit edhe sivjet, me një paradë madhështore në sheshin Sintagma në Athinë, grekët kanë festuar 25 Marsin, ditën e fillimit të Revolucionit kundër Perandorisë Osmane në vitin 1821, i cili u kulmua me krijimin e një shteti të pavarur.
Festimet kanë filluar me ngritjen e flamurit në shkëmbin e shenjtë të Akropolit e më pas mijëra qytetarë kanë ndjekur parakalimin e trupave ushtarake të forcave të armatosura.
Avionët luftarakë të Forcave Ajrore, F16 Viper, Rafale, Mirage, Phantom apo helikopterët të tipeve të ndryshme mbuluan qiejt e Athinës. Marshimi i trupave rezerviste dhe në fund njësitë ushtarake ceremoniale , Evzones, kanë krijuar entusiazëm tek të pranishmit.Kanë ndjekur paradën presidentja e vendit, liderë të partive politike, diplomatë të huaj etj.
Kreu i qeverisë greke Kyriakos Mitsotamis nga Kanadaja ku ndodhet për vizitë ka marrë pjesë në festimet e omogjenëve grekë bashkë me kryeministrin Justin Trudeau dhe ka dhënë mesazhin e tij.
“Është vërtetë një nder dhe kënaqësi e madhe të përfaqësoj vendin tonë sot, këtu në Montreal, në këtë paradë vërtetë mbresëlënëse me rastin e përvjetorit të Pavarësisë Kombëtare të 25 Marsit”, Kyriakos Mitsotakis kryeministër i Greqisë.
Ndërkohë për herë të parë në historinë e Greqisë , lideri i partisë më të madhe opozitare Syriza, Stefanos Kasselakis, ka marshuar me togën e tij në qendër të Tebës, aty ku ai kryen shërbimin ushtarak.
Më herët në Mitropolin e Athinës, Kryepeshkopi i Greqisë ka mbajtur Doksologjinë e shenjtë pasi 25 marsi , përveç domethënies së saj kombëtare, përkujtohet gjithashtu tradicionalisht si dita fetare e Ungjëllizimit.
