Në një kohë që Shqipëria, por veçanërisht Tirana, është mbërthyer nga shifrat e larta të personave që humbin jetën nga Covid 19, por edhe numri tejet i lartë i personave që po luftojnë në spital dhe shtëpi me virusin, kryetari i Bashkisë së Tiranës, Erion Veliaj, vazhdon të jetë i fokusuar te propaganda.
Për të pasur sukses edhe më shumë se shefi i tij ditët e fundit, Bashkia e Tiranës, ka hapur një tender në Agjencinë e Prokurimit Publik me vlerë plot 41.265.000 pa TVSH (me TVSH rreth gjysëm milioni USD) për të blerë pajisje audiovizive.
Shifra, por edhe pajisjet, do t’i kishin zili edhe televizionet publike, pasi Veliaj po blen teknologji të fundit për të bërë video apo lidhje direkte nga çdo skaj i Tiranës, apo rrethinave të saj. Objekti zyrtar i tenderit është “rritja e kapaciteteve të teknologjisë së informacionit e komunikimit dhe ripërtëritja e teknologjisë audiovizive”.
Objekti i tenderit nuk është i TVSh-së, por i Bashkisë së Tiranës, e cila ka luksin që të shpenzojë taksat e banorëve të kryeqytetit për të tilla pajisje. Madje, në një kohë që shumica e banorëve i kanë sytë dhe veshët nga Covid 19, pasi me këto shifra, apo keqmenaxhimi i situatës, çdo kush ka në fokusin e përditshëm shëndetin vetjak, apo të personave të afërm. Dhe, natyrisht ekonominë e varfër familjare, ku një përqindje të rrogave po shkojnë për analiza, medikamente apo edhe dezifektantë për të luftuar këtë pandemi.
Në vend që këto para të shkonin për punë publike, apo për të ndihmuar këto që ka nevojë, ato shkojnë për propagandën e Veliajt, i cili duket se ka filluar fuqishëm fushatën elektorale.
Zgjedhjet e 25 prillit 2021 kanë qenë në fokus të takimeve të fundit të kryebashkiakut, i cili, në pamundësi për të “rreshtuar” punonjësit e bashkisë, ka gjetur mundësi që të shfaqet me teknologji të fundit në televizionet publike apo në rrjetet sociale.
Duke u ndalur te tenderi, “Bold News” ka siguruar edhe dokumentet shoqëruese, ku mësohet se e gjithë vlera prej 41.265.000 lekësh pa TVSH do të shpenzohet vetëm për 30 ditë. Në dokumente thuhet se kohëzgjatja e kontratës ose afati kohor për ekzekutimin është vetëm 30 ditë nga data lidhjes së kontratës.
Dokumentet kanë edhe pajisjet që do të blihen, të cilat janë fjala e fundit e teknologjisë. Bashkia kërkon mikrofon dual channel me wireless, laptop, aparate fotografik që filmojnë video, stativ monopod, stativë tripod për aparate fotografik si dhe lente të madhësive të ndryshme. Kërkon pajisje livestreamer me 6 kamera, ginbalt, blice si dhe mikrofone mizë. Gjithashtu edhe dhjetëra kompjuterë montazhi, laptope etj, etj. Pra, ndryshimi është i madh, i pajisjeve që përdorim njerëzit e mediave në konferenca dhe i pajisjeve të zyrave të propagandës së Rilindjes!
