Pse Vuçiq po kërkon trazira para se Chris Hill të shkojë në Beograd?!

Aktuale

Pse Vuçiq po kërkon trazira para se Chris Hill të shkojë në Beograd?!

Më: 15 tetor 2021 Në ora: 21:53
Aleksandër Vuçiq

Lajmi që u dha dje me shqetësim nga mediat e Beogradit, është se diplomati shumë i njohur, sidomos për Ballkanin, Chris Hill, do të zëvendësojë Anthony Godfrey ende pa e mbaruar mandatin e tij, si ambasador i SHBA në Serbi.

I çuditshëm është fakti se aspak ky lajm nuk u diskutua në mediat shqiptare, edhe pse urgjenca e ngjarjeve në veriun e Kosovës, nuk lë shumë hapësirë për t’u marrë me një analizë që shikon më larg.

Por në fakt, ajo që po ndodh sot në veriun e Kosovës, ka shumë lidhje, madje të dorës së parë, me atë që Preasidenti Joe Biden do të dërgojë në Beograd, një nga gurët më të mirë të diplomacisë amerikane- Christofer Hill.

Po përse Hill po dërgohet në Ballkan, e ç’lidhje kanë ngjarjet e fundit me të.

Chris Hill, siç dihet, është peshë e rëndë e diplomacisë amerikane, që u njoh botërisht si kryenegociator gjatë mandatit Obama për çështjen bërthamore të Koresë së Veriut.

Megjithatë, karriera e zotit Hill është shënuar fuqishëm në ngjarjet e Ballkanit në vitet 90. Pasi ka qenë në Beograd si diplomat i ri, ai në 1991 vjen në Tiranë si zëvendës ambasador që hapi selinë diplomatike të Uashingtonit pas 45 vjet ndërprerje.

Më pas shkoi ambasador i SHBA-së në Shkup, e ndër të tjera, ai ka qenë një nga njerëzit më të rëndësishëm që së bashku me Richard Hoolbroke, përgatitën negociatat për Kosovën, pra Rambujenë, tekstin e saj që u bë bazë për rezolutën 1244 të OKB-së, e më pas operacionin për çlirimin e Kosovës.

Hill, është një “buldozer” që shtyn çështjen, siç është quajtur ish-shefi i tij, i ndjeri Hollbroke.

Ky diplomat, i cili  para dy vjetësh ishte në Tiranë ku dha dhe intervista të ndryshme, deklaroi se është tërhequr, pra në pension dhe jep leksione në një universitet në SHBA si pedagog i jashtëm.

Rithirrja e tij “nën armë”, logjikisht të çon në një përfundim, se bëhet fjalë për një gjë të rëndësishme që e njeh dhe di ta bëjë, më shumë nga të gjithë të tjerët.

E nëse është thirrur, ka shumë gjasa se kjo po ndodh pasi ai do të jetë kryenegociatori i SHBA-së për të mbylur përfundimisht çështjen mes Kosovës dhe Serbisë, pra marrëveshjen për njohjen e ndërsjelltë.

Gabriel Escobar, që është zyrtari i lartë i Departamentit të Shtetit, apo i dërguari special për Ballkanin, Cris Hill-in  e ka mentor të tij, ndaj i ka kërkuar ndihmë “ustait” të vjetër për të zgjidhur çështjen.

Pra, në këtë pikë, jemi në zhvillimin final, ku dhe SHBA tashmë e ka formësuar planin për ta mbyllur përfundimisht “konfliktin e ngrirë” në Ballkan.

E si e tillë, edhe ngjarjet që zhvillohen së fundmi, janë lëvizje centrifugale, të provokuara, apo që provokojnë këtë zhvillim të rëndësishëm që pritet së shpejti.

E në këtë aspekt, për marrëveshjen ndërmjet Serbisë dhe Kosovës, duket se qendra bazike e diskutimeve do të jetë statusi i veriut të saj. Ndaj Beogradi po rrotullon gjithçka rreth kësaj çështje, duke bërë që çdo rast; si ai i targave, apo aksioni i djeshëm anti-kontrabandë, të kthehet në një viktimizim dhe kryengritje të njerëzve të veriut.

Duket qartë se në të dy rastet, ka qenë Albin Kurti, që e ka “gërvishtur plagën”, duke provokuar e marrë nismën i pari. Gjasat janë, edhe sipas qëndrimeve në terren, se këtu Kurti nuk është i vetëm, por ka asistencën dhe shtytjen e amerikaneve e ndoshta edhe të Berlinit.

Megjithatë, është e paqartë sesi është plani i Kurtit në këtë pikë, pasi ka shumë gjasa, që operacioni për rikthimin e kontrollit në veri të Kosovës, i cili për 20 vjet ka qenë jashtë kontrollit të Prishtinës, të kthehet në një boomerang. Pasi nga një tentativë për të vendosur kontrollin, mund të shkojmë në hapjen e një zone konflikti, ecila do të kërkojë negociata të tjera për ta zgjidhur atë. Një aksiomë tashmë në diplomaci.

E që do të diskutohet për veriun në negociatat me Serbinë, as nuk ka qari për këtë, por e gjithë puna është sesi do të flitet. Logjika e Asosacionit të komunave që e fut rolin e Beogradit edhe në Deçan e Graçanicë, është natyrisht i papranueshëm.

Por a mos vallë jemi afër një variant të një Asocacioni të Veriut, ku jo më kot gjatë trazirave për targat, “mbiu” tabela në Jarinjë e Brnjak?

E nëse jemi këtu, duket se është më afër variantit “të shkëmbimit të territoreve”, ose dhënia e një statusi autonomie substanciale- veriut.

Ndarja e Zajednicës nga vektori i saj në Perëndim e qendër të Kosovës është realisht një fitore, pastaj se si do të negocohet për katër komunat e veriut, kërkon sërish një strategji mjaft të mirëmenduar.

Por fakt është se Vuçiq, me “vendimin” që shpalli dje se ka marrë për veriun e Kosovës, ka diçka “fakt të kryer”, e këtë natyrisht do ta bëjë duke trazuar pak atë “planin që ai ka folur me amerikanët”. Pasi siç dihet, Vuçiq në këtë është një agjent i dyfishtë mes Moskës dhe Perëndimit.

Në fund të këtij muaji Vuçiq do të vizitojë Rusinë i ftuar nga Putin, i cili e ka bërë të qartë se nuk e lëshon Serbinë dhe Republika Srbska-n. Do ta mbajë fort influencën e tij, ngaqë aty ka edhe dy rrugët e gazsjellësave që furnizon Europën Veriore, e këtu duket se edhe amerikanët kanë rënë dakord.

Po deri ku është pazari për veriun e Kosovës?

Kjo është çështja, ndaj vyen që Prishtina të ketë një strategji të sajën e ta nisë ta debatojë. Natyrisht jo në panelet me Valon Sylën e tallavanë e paneleve të Buzhalës, por në opinion e në shoqërinë politike…/Pamfleti

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat