Subaru e Japonisë të enjten zbuloi veturën e saj të parë tërësisht elektrike, Solterra, rezultat i një projekti të përbashkët zhvillimi dyvjeçar me aksionerin e saj më të madh, Toyota.
Lansimi i veturës të shërbimeve sportive (SUV) vjen mes kërkesës së përshpejtuar për automjete elektrike, ndërsa kombet në mbarë botën shtrëngojnë rregulloret mjedisore për të ulur emetimet e karbonit. Toyota muajin e kaluar njoftoi versionin e saj të një automjeti elektrik me bateri (BEV), bZ4X.
Zhvendosja teknologjike nga motorët me djegie të brendshme përbën një sfidë për prodhuesit më të vegjël të veturave, si Subaru, që kanë më pak mundësi të financojnë zhvillimin e shtrenjtë të EV-ve. Në të njëjtën kohë, është një mundësi për prodhuesit më të mëdhenj të veturave, si Toyota, që të afrojnë rivalët më të vegjël financiarisht.
Tani për tani, Solterra do të prodhohet nga Toyota në Japoni dhe Subaru mund të lëvizë prodhimin në tregun e saj kryesor, Shtetet e Bashkuara, kur të ketë vëllim të mjaftueshëm të shitjeve.
Shitjet e automjeteve në Subaru janë më pak se një e dhjeta e atyre në Toyota, prodhuesi më i madh i veturave në botë për nga vëllimi i prodhimit.
Toyota zotëron një të pestën e Subaru dhe ka 5% të aksioneve në Mazda, e cila planifikon të lansojë 13 vetura të elektrizuara deri në vitin 2025, duke përfshirë hibride dhe BEV që do të përfshijnë teknologjinë Toyota.
