Kryebashkiaku i Moskës ka njoftuar se personeli mjekësor, mësuesit dhe punonjësit socialë mund të fillojnë të regjistrohen për vaksinim ndaj Covid-19 duke nisur nga e premtja.
Injeksionet e para do të bëhen në fundjavë dhe, ndërsa qyteti furnizohet më shumë me vaksinën Sputnik V, kryetari i Bashkisë premtoi të zgjerojë listën e njerëzve që janë të kualifikuar për ta marrë.
Përhapja graduale, e urdhëruar nga Presidenti Vladimir Putin të mërkurën, do të fillojë ndërsa Sputnik V është ende duke u testuar për sigurinë dhe efikasitetin.
Me 28,145 raste të reja me koronavirus të konfirmuara në Moskë të enjten, dhe 554 vdekje, nevoja për një vaksinë efektive duket të jetë urgjente, veçanërisht pasi Kremlini vazhdon ta përjashtojë mundësinë e një bllokim kombëtar.
Rusia ishte e para që regjistroi një vaksinë ndaj Covid-19 për përdorim në gusht, para se testet e fazës III në Sputnik të kishin filluar.
Zhvilluesit e vaksinës tani pretendojnë se ajo mbron deri në 95% të personave që e marrin, por kjo bazohet vetëm në të dhëna të ndërmjetme. Efektet anësore të raportuara duken të krahasueshme me vaksinat e tjera Covid.
Rreth 40,000 vullnetarë po marrin pjesë në testet e fazës III të vaksinës, por përveç kësaj, Rusia thotë se mijëra punonjës në punë me rrezik të lartë – përfshirë mjekët – tashmë janë vaksinuar.
