Kroacia ndalon Malin e Zi në negociatat me BE-në, ja çfarë kërkon Zagrebi

Evropë

Kroacia ndalon Malin e Zi në negociatat me BE-në, ja çfarë kërkon Zagrebi

Më: 20 nëntor 2026 Në ora: 16:21
Metelko Zgombiq

Kroacia nuk dëshiron që çështja e demarkacionit detar të ngadalësojë dhe vonojë përparimin e Malit të Zi në rrugën e tij evropiane dhe është gati ta diskutojë atë më vonë, por Podgorica duhet të konfirmojë kufirin tokësor në përputhje me të drejtën ndërkombëtare.

Kështu tha sekretari i Shtetit në Ministrinë e Punëve të Jashtme Andreja Metelko Zgombiq, pas një takimi të ministrave për çështjet evropiane të shteteve anëtare të BE-së.

"Ne nuk duam që çështja e demarkacionit detar të ngadalësojë dhe vonojë përparimin e Malit të Zi në rrugën e tij evropiane. Jemi gati ta diskutojmë më vonë, por ajo që është e rëndësishme është që duam ta shohim Malin e Zi të konfirmojë këtë ish-kufi republikan", tha Metelko Zgombiq.

Kryenegociatori malazez Bojan Bozhoviq i dërgoi një letër Metelko Zgombiq të mërkurën, në të cilën deklaroi se Podgorica nuk mund të pranojë përcaktimin e njëanshëm të kufirit, por se është gati të përgatisë një draft marrëveshjeje për demarkacionin tokësor dhe detar sa më shpejt të jetë e mundur.

I gjithë gadishulli Prevlaka, përfshirë Kepin Oshtro, i përkiste administrativisht Kroacisë para shpërbërjes së Jugosllavisë.

Sipas përfundimeve të Komisionit të Arbitrazhit të Konferencës së Paqes për ish-Jugosllavinë, të udhëhequr nga juristi francez Robert Badinter, kufijtë e mëparshëm administrativë midis republikave jugosllave u bënë kufij shtetërorë të njohur ndërkombëtarisht, duke zbatuar parimin juridik ndërkombëtar uti possidetis juris.

Metelko Zgombiq theksoi se ekspertët kroatë dhe malazezë, si dhe kadastrat e të dy vendeve, konfirmuan se ky është pikërisht kufiri i republikës.

"Mund të thuhet se konfirmimi i kufirit të ish-republikës nuk është çështje demarkacioni. Është çështje vlerash, është çështje nëse Mali i Zi i pranon parimet e së drejtës ndërkombëtare, përfundimet e Komisionit Badinter. Dua të besoj se Mali i Zi nuk do të ketë dhe nuk mund të ketë problem ta konfirmojë këtë", tha Metelko Zgombiq.

Të enjten, Mali i Zi mbylli dy kapituj të tjerë negociues, kapitullin 16 (Taksat) dhe kapitullin 22 (Politika rajonale dhe koordinimi i instrumenteve strukturore). Presidenca irlandeze u përpoq të mbyllte kapitullin 15 (Energjia), por mungonte pëlqimi i Kroacisë.

Protokolli i Përkohshëm i vitit 2002 konfirmoi juridiksionin kroat mbi pjesën kontinentale të gadishullit, së bashku me një regjim të përkohshëm në det, i cili ende pret një zgjidhje të përhershme midis Kroacisë dhe Malit të Zi.

Sot mund të lexoni Shfletoni kopertinat