Portugalia, spitalet e të cilës janë mbingarkuar për shkak të Covid-19, po shqyrton mundësinë për të dërguar dhjetëra të sëmurë për trajtim në Austri. Viena zyrtare është vetëofrur për të ndihmuar Portugalinë në situatën e vështirë që po kalon në sistemin shëndetësor.
“Këto janë gjeste të rëndësishme të solidaritetit europian, por simbolike në betejën kundër pandemisë”, theksoi Ministria e Shëndetësisë portugeze në një komunikatë.
Ky vend regjistroi një rritje të numrit të pacientëve të shtruar në kujdes intensiv, që arriti në mbi 900 për herë të parë që nga fillimi i pandemisë.
Portugalia ka pranuar tashmë ndihmën e propozuar nga Gjermania. Kjo e fundit i ka dërguar një ekip prej 26 mjekësh dhe infermierësh, që do të kenë në ngarkim një njësi të kujdesit intensiv të pajisur me tetë shtretër, të vendosur në një spital privat në Lisbonë.
