Disa provinca gjermane raportojnë se qytetarët e tyre kanë shprehur pak interes për vaksinën e ndërmarrjes britanike-suedeze, AstraZenece për shkak të raporteve të mediave në lidhje me efektivitetin e zvogëluar të saj kundër coronavirusit.
“Shumë anuluan takimin e tyre të vaksinimit kur dëgjuan se duhet të vaksinoheshin me AstraZeneca”, tha ministria e shëndetësisë e shtetit federal të Nordrhein-Westfalen.
Në qytetin Muenster në veri të kësaj krahine, 30 përqind e stafit mjekësor të mjediseve shëndetësore të qytetit refuzuan të vaksinohen me këtë vaksinë.
Ministri i Shëndetësisë, Jens Spahn tha të mërkurën se vaksina AstraZeneca është e sigurt dhe efektive. “Unë do të vaksinohesha menjëherë me këtë vaksinë”, tha Spahn. Sipas tij, reagimet ndaj kësaj vaksine nuk janë më të shpeshta sesa me vaksinat e tjera.
Skepticizmi në lidhje me këtë vaksinë ekziston për shkak të efikasitetit dukshëm më të ulët se vaksinat nga prodhuesit e tjerë, të tillë si Biontech/Pfizer dhe për shkak të aktivitetit të zvogëluar tek të moshuarit.
