Deklaratat mbështetëse të Perëndimit për Ukrainën janë në rritje, për shkak të rritjes së prezencës ushtarake të Rusisë në kufi me këtë shtet, çka ka rritur shqetësimet për zgjerim të konfliktit.
Sekretari i Përgjithshëm i NATO-s Jens Stoltenberg ka thënë më 6 prill se ka telefonuar presidentin e Ukrainës, Volodymyr Zelenskyi “për të shprehur shqetësimet rreth aktiviteteve ushtarake të Rusisë në dhe rreth Ukrainës si dhe për shkeljet e vazhdueshme të armëpushimit”.
Zelenskyi, në anën tjetër, është raportuar t’i ketë thënë Stoltenbergut që rruga drejt anëtarësimit në NATO, është rruga e vetme për t’i dhënë fund luftës në lindje të Ukrainës, ku separatistët e përkrahur nga Rusia vazhdojnë betejën me forcat qeveritare për shtatë vjet me radhë.
Zelenskyi u ka bërë thirrje vendeve anëtare të NATO-s që të fuqizojnë prezencën e tyre ushtarake në Detin e Zi si “parandalues të fuqishëm” për Moskën.
Dmitry Peskov, zëdhënës i presidentit rus Vladimir Putin e ka karakterizuar gjithë situatën si “problem të brendshëm” dhe ka thënë se anëtarësimi i Ukrainës në aleancën transatlantike do të përkeqësojë gjërat.
“Ne dyshojmë shumë se një gjë e tillë do t’i ndihmojë Ukrainës që të zgjidhë problemet e brendshme”, ka thënë Peskov më 6 prill.
“Ne mendojmë se kjo gjë vetëm do të përkeqësojë situatën”.
Më herët gjatë ditës, zëvendësministri i Jashtëm rus Sergei Ryabkov, ka thënë se zyrtarë të lartë rusë dhe amerikanë kanë diskutuar për situatën në verilindje të Ukrainës.
Raportimet e agjencisë së lajmeve TASS, nuk janë konfirmuar ende nga zyrtarë amerikanë.
Raportimet ruse vijnë pas kërkesës së Departamentit amerikan të Shtetit që Moska të sqarojë “provokimet” përfshirë lëvizjet ushtarake në rajon.
Më 5 prill, kryeministri britanik Boris Johnson ka shprehur “shqetësime të mëdha” për prezencën ruse afër kufirit me Ukrainën.
Si pasojë e konfliktit në lindje të Ukrainës kanë vdekur 13,000 persona.
Rusia është duke kërkuar që Ukraina t’i japë rajonit të kontrolluar nga separatistët më shumë autonomi, gjë që do t’ia parandalonte këtij shteti anëtarësimin në NATO./REL
