“Ju nuk jeni vetëm në hidhërimin tuaj”

Evropë

“Ju nuk jeni vetëm në hidhërimin tuaj”

Më: 19 prill 2021 Në ora: 08:39
Presidenti gjerman Steinmeier

Presidenti gjerman Steinmeier u dha kurajo të afërmve në ceremoninë përkujtimore për gati 80.000 të vdekurit nga korona. Ai bëri thirrje edhe për kohezion e për rrugë të përbashkët për të dalë nga pandemia.    

Më shumë se një vit pas fillimit të pandemisë së koronës, drejtuesit e shtetit gjerman dhe të kishave kujtuan rreth 80.000 të vdekurit nga pandemia dhe u shprehën ngushëllimet e tyre familjarëve. Në ceremoninë qendrore përkujtimore, Presidenti i Gjermanisë, Frank-Walter Steinmeier i bëri thirrje gjithashtu shoqërisë të qëndrojë e bashkuar.

"Le të mos lejojmë që pandemia, e cila na detyron të distancohemi si njerëz, të na ndajë edhe si shoqëri," tha ai në sallën e koncerteve të Berlinit, në Berliner Konzerthaus në Gendarmenmarkt.

Image

"Sot ne duam të përkujtojmë si shoqëri ata që vdiqën një vdekje të vetmuar dhe shpesh të mundimshme në këto kohë të errëta", tha Presidenti i Gjermanisë. Njerëzve që vajtojnë të dashurit e tyre të vdekur ai u përcolli: "Ju nuk jeni vetëm në vuajtjen tuaj, nuk jeni vetëm në hidhërimin tuaj". Pandemia ka hapur plagë të thella. Në të gjithë botën kanë vdekur më shumë se tre milionë vetë.  "Vajtimi na lidh përtej kufijve," tha Steinmeier.

Le të flasim për dhimbjen dhe vuajtjen dhe zemërimin

Image

Përveç hidhërimit, disa njerëz ndiejnë gjithashtu "hidhërim dhe zemërim", tha kreu i shtetit. Ai e kupton këtë. "Politikanët duhej të merrnin vendime të vështira, ndonjëherë tragjike, për të parandaluar një katastrofë edhe më të madhe." Politikës gjithashtu iu desh të mësojë. Atje ku ka pasur gabime dhe mangësi, ato duhet të rivlerësohen, por jo në këtë ditë, tha Steinmeier.

"Lutja ime sot është: le të flasim për dhimbjen dhe vuajtjen dhe zemërimin. Por le të mos humbasim duke akuzuar, duke parë prapa, por përkundrazi, të mbledhim forcë për rrugën përpara, rrugën për të dalë nga pandemia, në të cilën duam të ecim dhe do të ecim, po të ecim së bashku".

Më parë, kishat shprehën ngushëllime për të afërmit në një shërbim ikumenik në Kishën Përkujtimore-Kaiser-Wilhelm. Në shërbimin ikumenik, i cili u bashkëorganizua nga klerikë me besim hebre dhe mysliman, kryetari i Konferencës së Ipeshkve Gjermanë, Georg Bätzing, tha:

Image

"Sëmundja dhe vdekja nuk largohen dot nga ky vit i gjatë, ato lënë të çara të thella në jetët e shumë njerëzve". Vdekja na u afrua më shumë se më parë. Prandaj është e drejtë që të ndalemi dhe të kujtojmë ata shumë që kanë ndërruar jetë.

Kryetari i këshillit të Kishës Evangjelike në Gjermani, Bedford-Strohm, e quajti përvojën e krizës gjatë pandemisë "traumë për shpirtin" tonë.

Në ceremoninë përkujtimore të organizuar nga Presidenti Steinmeier morën pjesë pesë të afërm dhe krerët e katër organeve të tjera kushtetuese: Presidenti i Bundestagut, Wolfgang Schäuble, Presidenti i Këshillit Federal, Reiner Haseloff, Kancelarja Angela Merkel dhe Presidenti i Gjykatës Kushtetuese Federale, Stephan Harbarth. Kryeministri i Berlinit, Michael Müller dhe një përfaqësues i Trupit Diplomatik ishin gjithashtu të pranishëm në ceremoni, e cila u zhvillua nën masat më të rrepta të higjienës./DW

commentFirst article
Sot mund të lexoni Shfletoni kopertinat