Kremlini nuk e "respekton" çmimin për Navalnyn

Evropë

Kremlini nuk e "respekton" çmimin për Navalnyn

Më: 21 tetor 2021 Në ora: 13:57
Lideri i opozitës ruse, Aleksei Navalny

Kremlini tha se nuk e “respekton” vendimin e Parlamentit Evropian për t’ia ndarë Aleksei Navalnyt çmimin më të lartë për të drejtat e njeriut.

Udhëheqësi i burgosur i opozitës ruse, Aleksei Navalny, fitoi të mërkurën (20 tetor) Çmimin Sakharov për Lirinë e Mendimit.

Çmimi vjetor i Parlamentit Evropian iu nda atij për, siç u tha, ekspozimin e korrupsionit në Rusi dhe të përpjekjeve për frenimin e lirive në këtë vend.

Shumë ekspertë thonë se ky veprim i BE-së i dërgon një mesazh të fortë presidentit rus, Vladimir Putin se, kundërshtari i tij më i ashpër tanimë është një figurë globale dhe jo vetëm një fenomen lokal rus.

Kremlini e konsideron Navalnyn si një kriminel që drejtonte një organizatë ekstremiste.

“Ne e respektojmë këtë institucion (Parlamentin Evropian), por askush nuk mund të na detyrojë të respektojmë vendime të tilla”, u tha gazetarëve në Moskë, zëdhënësi i Kremlinit, Dmitry Peskov.

Navalny, një nga kritikët më të zëshëm të presidentit rus Vladimir Putin, u burgos në janar pasi u kthye në Rusi nga Gjermania, ku u trajtua për një helmim që ai tha se ishte urdhëruar nga Kremlini.

Moska e mohon akuzën.

Bashkimi Evropian ka vendosur sanksione ndaj zyrtarëve rusë për helmimin dhe burgosjen e Navalnyt.

Avokati, 45-vjeçar u dënua me 2 vjet e gjysmë burg për një shkelje të lirimit me kusht. Ai e ka quajtur të motivuar politikisht.

Që kur ka filluar ndarja e çmimit Sakharov më 1988, Navalny është fituesi i tretë nga Rusia.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat