Emigrantët që kalojnë Detin Mesdhe nga Afrika në Evropë bëjnë një udhëtim të rrezikshëm me varka të mbingarkuara dhe të dobëta. Gati 1,600 emigrantë kanë vdekur këtë vit, ndërsa dhjetëra mijëra që arrijnë në Evropë nuk kanë asnjë garanci për të marrë azil. Korrespondenti i Zërit të Amerikës Ruud Elmendorp raporton mbi historitë e tyre të dëshpërimit dhe shpresës në bordin e një anijeje shpëtimi në Detin Mesdhe.
Jemi në bordin e anijes së shpëtimit Ocean Viking të organizatës SOS Mediterranee.
Në kuvertë është 10-vjeçari Khaled, duke ngrënë kikirikë. Ai është këtu me 300 të tjerë të sapo shpëtuar nga dallgët vdekjeprurëse të Detit Mesdhe.
Khaled dhe nëna e tij Leila ishin në një varkë të vjetër kur u shpëtuan.
Nënë e bir janë me fat sepse shumë të tjerë që kanë tentuar të kalojnë Mesdheun kanë humbur jetën në det.
Leila, e cila u largua nga Siria, thotë se e bëri udhëtimin e pabesë për të ndihmuar djalin e saj.
Ajo thotë se u largua nga Siria për shkak të luftës, për ta çuar djalin e saj për të parë një mjek në Evropë, sepse ai është ende i plagosur nga një bombë në Siri.
Leila dhe Khaled udhëtuan nga Siria në Libi me rrugë ajrore dhe për shkak të kufizimeve të vizave nuk panë zgjidhje tjetër veçse të hipnin në një varkë për në Evropë. Ajo u përpoq të kalonte katër herë, por çdo herë u kap nga roja bregdetare libiane.
Por Leila nuk u dorëzua dhe 4500 dollarët që pagoi për këtë tentativë nuk ishin të kota.
As për pasagjerët e tjerë në bordin e anijes Ocean Viking.
24-vjeçari Abdel nga Gana, u largua nga vendi i tij me autobus dhe pastaj me këmbë për t'i shpëtuar varfërisë, por pa se kushtet ishin më të këqija në Libi.
“Edhe Libia është e vështirë. Nuk mund të shkosh askundi; dëgjon krisma armësh në çdo kohë, në çdo kohë. Kjo është arsyeja pse ne përpiqemi të kalojmë nga Libia në Itali”, thotë ai.
Është gjithashtu Husseini, një fermer sirian që humbi këmbën në një shpërthim bombe dhe shiti shtëpinë e tij për të shkuar në Evropë për të gjetur një protezë. Është punëtori i ndërtimit Ibrahimi që dëshiron të ndërtojë një të ardhme më të qëndrueshme jashtë vendit të tij. Miq me një lidhje të përbashkët, ata kalojnë kohën së bashku duke luajtur lojëra ose duke kërcyer.
Momenti i realitetit vjen në Itali. A do të njihen emigrantët si punëtorë të përkohshëm apo si azilkërkues?
Përfaqësuesja e Komisionerit të Lartë të Kombeve të Bashkuara për Refugjatët në Itali, Chiarda Cardolletti, thotë se të gjitha rastet e emigrantëve po dëgjohen.
“Në Itali sot, nëse je azilkërkues me një kërkesë të besueshme për azil, do të jepet një shans i drejtë”, thotë Chiarda Cardolletti.
Por realiteti është se migrantët që nuk kualifikohen mund të kthehen.
Leila, megjithatë, ndihet e sigurt. Ajo thotë se kur të mbërrijnë në Evropë dëshiron të sjellë edhe fëmijët e tjerë, për t'u siguruar atyre një arsim të mirë.
Ocean Viking tani është ankoruar në molin e qytetit lindor Augusta të Siçilisë. Pas disa javësh, anija do të lundrojë përsëri për të shpëtuar më shumë emigrantë në vështirësi në Mesdhe./VOA
