Merkel: Merreni seriozisht këtë virus të pabesë

Evropë

Merkel: Merreni seriozisht këtë virus të pabesë

Më: 4 dhjetor 2021 Në ora: 21:03
Angela Merkel

Në video-mesazhin e saj të fundit si kancelare, Angela Merkel ka bërë thirrje për solidaritet në luftën kundër përhapjes së koronavirusit dhe ka rinovuar apelin e saj për më shumë vaksinime.

”Ne jemi në mes të kësaj vale të katërt të pandemisë në një situatë shumë të rëndë dhe në disa rajone të vendit gjendja mund të quhet dramatike. Merreni seriozisht këtë virus të pabesë”, kërkoi ajo.

Merkel iu referua “njësive të mbipopulluara të kujdesit intensiv”, pacientëve të sëmurë rëndë që duhej të fluturonin nëpër Gjermani dhe “numrit tmerrësisht të lartë” të njerëzve të cilëve virusi u ka kushtuar jetën.

”Secili prej tyre lë pas familje apo miq, të shtangur dhe të pafuqishëm. Kjo është veçanërisht e hidhur sepse mund të shmanget me vaksina efektive dhe të sigurta”, shtoi ajo.

Merkel falënderoi të gjithë ata “që janë të arsyeshëm dhe të kuptueshëm në këtë kohë të vështirë” dhe iu qëndruan rregullave për mbrojtje të vetvetes si dhe për kujdesin për të tjerët.

“Ata përbëjnë shumicën dërrmuese në vendin tonë. Ata tregojnë çdo ditë shpirtin qytetar që është kaq i mrekullueshëm për vendin tonë dhe pa të cilin asnjë kancelar apo qeveri nuk mund të arrijë asgjë”, tha ajo.

”Javët e vështira që vijnë mund të kapërcehen vetëm me një përpjekje të përbashkët”, tha Merkel.

Merkel largohet nga detyra javën e ardhshme dhe do të pasohet si kancelar nga Olaf Scholz i social-demokratëve (SPD). Scholz do të udhëheqë një koalicion trepalësh me të gjelbrit dhe FDP.

Ministri në largim i Shëndetësisë, Jens Spahn, shpjegoi se në tre ditët e fundit janë bërë gjithsej gati tre milionë vaksina.

Ndërkohë, më shumë se një e treta e të vaksinuarve mbi 60 vjeç kishin marrë gjithashtu mbrojtje përforcuese.

Qeveritë federale dhe shtetërore kanë vendosur një objektiv deri në 30 milionë vaksinime të para, të dyta dhe përforcuese deri në fund të vitit.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat