Kreu i Partisë Socialiste Serbe, Ivica Daçiq edhe një herë haptas mbron veprimet e ish shefit të tij, kriminelit të luftës Sllobodan Millosheviq, të njohur si Kasapi i Ballkanit.
Në temën e luftës në Ukrainë, ai ka thënë se “pyetja tani është se a është ky krijim i një rendi të ri botëror, një rishpërndarje e fuqisë apo diçka tjetër”.
“Nuk është e lehtë të kuptosh ndryshimet në rendin botëror dhe mendoj se Vuçiq tani e kupton pak më mirë Millosheviqin dhe presionet që ka pasur ai”, ka deklaruar ai, duke shtuar se “ai personalisht ka qenë dëshmitar i presioneve ndaj Serbisë dhe tani bëhet fjalë për izolimin e vendit, për ndalesa të ndryshme dhe për ndërprerje të investimeve të huaja".
Ai gjithashtu ka thënë se “ata që flasin për vënien e sanksioneve ndaj Rusisë, nuk punojnë kundër Rusisë por kundër Serbisë. Ne do të vendosim sanksione kundër Rusisë vetëm nëse ata tërheqin njohjen e pavarësisë së Kosovës”.
I pyetur a mendon se dialogu ndërmjet Kosovës dhe Serbisë do të vazhdojë, ai ka deklaruar se “nuk beson në vullnetin e mirë për të bërë një kompromis dhe se beson se BE-ja me naivitet pret që ta detyrojë Serbinë për diçka”.
“Unë mendoj se BE nuk dëshiron të ushtrojë presion mbi Prishtinën. Ata shpresojnë se ne do të dorëzohemi”,” ka thënë ai.
